«Мектепке жол» атты республикалық акция аяқталды. Аталмыш акция аясында 15 тамыздан 30 қыркүйек аралығында ауданның барлық мектептерінде әртүрлі шаралар өтті. Оның барлығы аз қамтылған және көп балалы отбасылар оқушыларына, жетімдерге, сондай-ақ ата-ананың қамқорлығынсыз қалған балғындарға көмек көрсетуге бағытталды.
Ауданның 150-ден астам меценаттары қайырымдылық шарасына белсенді түрде қатысты. Тек бір ғана Черноярка ауылдық округінде отыздан астам шаруа қожалықтары, ЖШС және жеке кәсіпкерлер мұқтаж бүлдіршіндерге көмек қолын созды. Бірқатарын атап өтер болсақ, олар – «Скугарева», «Надежда-1», «Иртыш», «Мечта», «Найверт», «Луч-1», «Ксания», «Дары природы», «Гулый» және тағы басқа. Жетекші ауылында да ел болашағының қамын ойлағандар табылды. Мәселен, МТС «Колос» ЖШС, «Азимут Энерджи Сервисез» АҚ айналасындағы көмекке зәру бүлдіршіндерге бей-жай қараған жоқ. Акцияға қатысқандар арасында «Луганск», «Маяк», «Жаңа қала», «Дарья», «Қуаныш», «Луч», «Искра» ШҚ, «Адис» ЖШС, А.Солдатова, М.Баубеков, Ж.Сұлтанова жеке кәсіпкерліктері бар. Ауданда 1150-ден астам балалар материалдық көмек алды. Оған жұмсалған қаржы 1 млн. 550 мың теңгені құрады. Айта кету керек, осы соманың 1 млн. 155 мың теңгесі демеушілер есебінен жұмсалды.
Р.МҰСТАФИНА
Павлодар ауданы.
