Жақында Павлодар қаласындағы №120-шы балалар бақшасының «Естияр Б» тобында «Алтын күз» мерекесі аталып өтті. Оған балғындармен бірге ата-аналар қауымы да қатысты. Аталмыш мерекеге балалар үлкен дайындықпен келіпті. Кейбірі ән салып, би билесе, енді біреулері жеміс-жидектер туралы мақал-мәтелдер айтып, өлеңдер оқып, мерекенің мазмұнын аша түсті. Кішкентай бүлдіршіндердің өнеріне ата-аналар қауымы тәнті болды. Олар жүздері бал-бұл жанған балғындардың қуанышына ортақтасып қана қоймай, өздері де бір сәт балалық шаққа саяхат жасап келгендей әсер алды. Сондай-ақ отбасында орысша тәрбиеленген кейбір балалардың мемлекеттік тілде еркін сөйлеп, балабақшадан алған білімінің жемісін көрген ата-аналар қуанышында шек болмады.
Осылайша, әр баланың бойындағы өнерін ашып көрсетуге ықпал еткен тәрбиешілер Арайлым Мүбәракқызы мен Диана Тұрысбекқызының еңбегі зор екенін атап өткен орынды.
Жалпы, қаламыздағы №120-шы балабақша қашанда жақсы істердің жаршысы болып, өзгелерге үлгі көрсетіп жүргені баршаға аян. Сайып келгенде, мұның бәрі - ұжым ішіндегі береке-бірлік пен қызметкерлер біліктілігінің арқасы екені сөзсіз.
Гүлнәр ДОСЫМБЕКОВА,
№120-шы балабақшаның ата-анасы,
Павлодар қаласы.
