Жаңа жыл қарсаңында Қашыр аудандық «Нұр Отан» ХДП филиалында аудан әкімі Б.Бақауов республикалық, облыстық және аудандық білім жарыстарына қатысып, аудан намысын қорғап жүрген дарынды оқушылармен кездесті. Оған, сондай-ақ, аудандық білім беру бөлімінің бастығы Р.Сәдуақасова және мектеп директорлары қатысты. Түрлі деңгейдегі білім сайыстарында жүлделі орындарға ие болып, ауданның абыройын асқақтатқан оқушылар ерекше қошемет пен құрметке ие болды. Жиын барысында әр оқушы өзінің қол жеткізген жетістіктері туралы айтып, жетекшілік жасаған мұғалімдерге ризашылықтарын білдірді. Шара соңында аудан әкімі жас жеткіншектерді Жаңа жылмен құттықтап, сыйлықтар табыс етті.
Гүлнар ЖАЯБАЕВА, Қашыр ауданы.
