Сейсенбі күні «Нұр Отан» ХДП Павлодар қалалық филиалының кезектен тыс есеп беру-сайлау конференциясы өтті. Шара барысында қалалық партия филиалының жаңа төрағасы тағайындалды. Делегаттар басшылыққа бірауыздан Павлодар қаласының әкімі Оразгелді Әлиғазыұлы Қайыргелдиновті лайық деп тапты.
«Нұр Отан» партиясы облыстық филиалы төрағасының бірінші орынбасары Айгүл Нұркина партияның қалалық құрылымы жетекшілігіне ұсынылған үміткердің өмірбаянына тоқталып, оның басқарушылық тәжірибесінің молдығын атап өтті. Бұған дейін филиал тізгінін ұстаған бұрынғы қала әкімі Б.Жоламановтың тұсында бірқатар оң істердің атқарылғанын да айтты.
Өз кезегінде О.Қайыргелдинов артылған сенімнің үдесінен шығатынына, Елбасының Жолдауында берілген тапсырмаларды орындауға күш салатынына уәде берді.
Конференция қатысушылары қалалық партия филиалының саяси бюросы, саяси бюро кеңесі және жемқорлықпен күрес жөніндегі қоғамдық кеңесінің құрамына өзгертулер мен толықтырулар енгізді. Партия мүшесі В.Жамулдинов жемқорлықпен күрес жөніндегі кеңестің төрағасы болып сайланды. Бұдан кейін қалалық мәслихат депутаттары А.Винерцев пен И.Теренченконың «Нұр Отан» ХДП халықтық тұғырнамасын іске асыруға байланысты атқарылған жұмыстар жөніндегі есептері тыңдалды. Соңында жаңадан партия қатарына өткен азаматтарға мүшелік куәліктер салтанатты түрде табысталды.
Н.ҚАНАТБЕКҰЛЫ.
