- 1972 жылғы 1 қаңтарда Павлодар қаласында облыстық ғылыми-техникалық кітапхана ашылды;
- 1982 жылғы 1 қаңтарда облыстық денсаулық сақтау бөліміне қарасты қалалық наркологиялық диспансер бой көтерді;
- 1987 жылғы 1 қаңтарда Павлодар қаласында ауылдық жерлердегі құрылыс жұмыстарын жобалық-сметалық құжаттармен қамтамасыз ету мақсатында «Целингипросельхоз» жобалау институтының филиалы ашылды;
- 1992 жылғы 2 қаңтарда Павлодар қалалық атқару комитетінің шешімімен облыс орталығында «Нептун» дене шынықтыру-сауықтыру кешені пайдалануға берілді;
- 1967 жылғы 10 қаңтарда мемлекеттік комиссия Павлодар алюминий зауытының екінші кезеңін тұрақты өнеркәсіптік пайдалануға қабылдады;
- 1967 жылғы 10 қаңтарда Павлодар қаласындағы құтқару станциясы пайдалануға берілді;
- 1957 жылғы 11 қаңтарда тың және тыңайған жерлерді игеруде қол жеткізген жоғары көрсеткіштер үшін КСРО-ның Жоғары Кеңесі Президиумының Жарлығымен Қазақстанның 139 еңбеккеріне Социалистік Еңбек Ері атағы беріліп, Ленин ордені және «Орақ пен балға» алтын медалі тапсырылды. Осындай марапаттарға облыстың 11 азаматы ие болды;
- 1982 жылғы 12 қаңтарда Павлодар облыстық атқару комитетінің шешімімен облыс орталығындағы Вокзальная көшесі Павлодар уездік революциялық комитетінің төрағасы Т.Дерибастың құрметіне Дерибас көшесі болып қайта аталды;
- 1967 жылғы 16 қаңтарда №1 Ертіс көмір кенішінде 100 миллионыншы тонна көмір алынды;
- 1977 жылғы 20 қаңтарда Павлодар қалалық атқару комитетінің шешімімен Г.Потанин атындағы Павлодар облыстық тарихи-өлкетану музейі Ленин көшесі, 149 мекенжайындағы ғимаратқа көшірілді;
- 1997 жылғы 20 қаңтарда Шарбақты ауданының орталығында «Мария - помощь христианам» Рим-католиктік шіркеуі» діни бірлестігі тіркелді. Аталмыш діни бірлестік, Германиядан жіберілген ақшалай қаржыға ауыл тарихында алғашқы діни ғимарат – «Во славу Божественному проведению» католиктердің храмын салды;
- 1997 жылғы 23 қаңтарда аймақ басшысының шешімімен қаржылық-экономикалық сауықтыруға бағытталған шараларды әзірлеу, кәсіпорындарды қаржылық сауықтыру, қайта ұйымдастыру бойынша рәсімдерін өткізу және төлемге шамасы келмейтін борышкерлерді жою мақсатында облыстық комиссия құрылды;
- 1962 жылғы қаңтарда Павлодар қаласында екінші ірі панельді үй құрылысының комбинаты пайдалануға берілді;
- 1977 жылғы қаңтарда Қазақ мал шаруашылығы ғылыми-зерттеу институтының қызметкерлері, сондай-ақ, облыстық ауыл шаруашылығы басқармасының мамандары Лебяжі ауданы Бесқарағай мемлекеттік асыл тұқымды зауыт қызметкерлерімен бірлесіп, солтүстік-қазақ мериносы атты жаңа қой тұқымын алды;
- 1967 жылғы қаңтарда қазіргі Ақсу қаласындағы Феррозауыт теміржол станциясы пайдалануға берілді;
- 1997 жылғы қаңтарда дәрі-дәрмектер шығаратын Павлодар зауытында аспирин өндірісі бойынша жаңа желі іске қосылды. Зауыттың жылдық қуаттылығы 350 миллион таблеткаға дейін ұлғайды, сонымен қатар, шығарылатын дәрі түрлері көбейді;
- 1972 жылғы қаңтарда «Богатырь» көмір кенішінің құрылысы Бүкілодақтық екпінді комсомол құрылысы деп жарияланды;
- 1952 жылғы 2 қаңтарда Павлодар облысының мұрағаттар және құжаттама басқармасының бастығы, «Павлодар облысы Ұлы Отан соғысы жылдарында. 1941-1945» (2010) мультимедиалық анықтамалық құралы авторларының бірі Халел Хайруллаұлы Әкімханов дүниеге келді;
- 1937 жылғы 8 қаңтарда механизатор, Социалистік Еңбек Ері Владимир Васильевич Леонов дүниеге келді;
- 1932 жылғы 2 қаңтарда Павлодар педагогикалық институтының шетел және орыс әдебиеті кафедрасының профессоры, филология ғылымының кандидаты Владимир Васильевич Мухин дүниеге келді (1996 жылғы 13 тамызда қайтыс болған);
- 1927 жылғы 21 қаңтарда КСРО және Қазақ КСР-ның жоғары үздік педагогы, Қазақ КСР-на еңбегі сіңген ұстаз (1987), Екібастұз қаласының құрметті азаматы (1987) Раиса Яковлевна Нуралина дүниеге келді (1992 жылғы 22 қыркүйекте қайтыс болған);
- 1837 жылғы 5 қаңтарда шығыс танушы, түркі танушы, этнограф және археолог, Қазақстан мен Павлодардың Ертіс өңірін зерттеуші Василий Васильевич Радлов дүниеге келді (1918 жылғы 12 мамырда қайтыс болған);
- 1907 жылғы 10 қаңтарда Павлодар облысы ағарту саласының үздік қызметкері, Қазақ КСР-нің еңбек сіңірген мектеп мұғалімі (1969), Ұлы Отан соғысына қатысушы Уәли Сәттібайұлы Сәттібаев дүниеге келді (1994 жылғы 23 қаңтарда қайтыс болған);
- 1912 жылғы 10 қаңтарда Кеңес Одағының Батыры (1944), запастағы подполковник Константин Фомич Шувалов дүниеге келді (1999 жылғы 1 наурызда қайтыс болған).
Павлодар облыстық
мемлекеттік мұрағаты.
