Құрметті оқырмандар! Редакциямызға Сіздерден күнделікті түсіп жататын хаттардың басым бөлігі белгілі бір мәселеге, көпшілікті толғандыратын сұрақтарға қатысты өріледі. Сіздердің тілек-ұсыныстарыңызды ескере отырып, газетімізде «Сауал – сізден, жауап - бізден» атты сұрақ-жауап айдарын жандандырдық. Көкейде жүрген сауалдарыңызға жауап іздесеңіздер, осы айдарға жолдаңыздар. Толғандырған мәселеге қатысты әр саланың мамандары, сарапшылар жауап береді.
Құрбанжан ШЕНБИЕВА, Ақсу қаласының тұрғыны:
Мектеп жасындағы үш баланың ата-анасымын. Балаларымның барлығы сабақтарын жақсы оқиды. Дегенмен, ана ретінде балаларымның бос уақытында шығармашылықпен немесе спортпен айналысуларын қалаймын. Облыс орталығында тегін қызмет көрсететін балалар клубтары бар ма?
Павлодар қалалық балалардың бос уақытын қамту және шығармашылық орталығының директоры Наталья ПАВЛОВСКАЯ:
- Әрине, бар. Біздің орталыққа қарасты ақысыз қызмет ететін 7 балалар клубы жұмыс істейді. Олар: «Эмеральд» (Қамзин к-сі, 360/1), «Дос» (Катаев к-сі, 97), «Рақым» (Жаяу Мұса к-сі, 1), «Азат» (Дерибас к-сі, 12/2), «Сәлем» (Естай к-сі, 56/1), «Өркен» (Амангелді к-сі, 50) және «Сауран» (Қамзин к-сі, 4). Бұл мекемелерде спорт, тіл үйрену және шығармашылық бағыттағы үйірмелер жұмыс істейді. Толық ақпаратты 32-23-43 телефоны арқылы алуға болады.
Әмина АЙТОВА, Павлодар қаласының тұрғыны:
Жалғызбасты зейнеткермін. Балаларым басқа қалада тұрады. Денсаулығым сыр бере бастағандықтан, үй шаруасы бойынша көмекке мұқтажбын. Павлодар қаласында мен сияқты жалғызілікті азаматтарға әлеуметтік көмек көрсететін мекемелер бар екенін естідім. Арнайы көмек алу үшін қайда хабарласуым керек?
Павлодар қаласы тұрғындарына әлеуметтік көмек көрсету орталығы директорының орынбасары Ләйлә ЖҮНІСОВА:
- Тұрмыстық жағдайдағы көмек алу мүмкіндігіне ие болу үшін Кривенко көшесі, 25 үй, 205-206 кабинеттерге келуге немесе 32-30-80 анықтама телефонына хабарласуға болады. Әлеуметтік көмек алу үшін төмендегі құжаттарды жинастыру қажет: 1) Жазбаша өтініш; 2) Туу немесе жеке куәлігінің көшірмесі; 3) Азаматтарды тіркеу кітабы немесе мекенжай бойынша тұратын жерден анықтама; 4) Мүгедектігі туралы анықтама (қарт адамдардан талап етілмейді); 5) Медициналық кітапша; 6) Зейнеткерлік жастағы тұрғындар үшін зейнеткер куәлігінің көшірмесі. Айта кетерлігі, тиісті құжаттарды жинастыру барысында әлеуметтік қызметкерлердің көмегіне жүгіне аласыз.
Сауалдарыңызды 8 (7182) 61-80-37 телефон нөмірі арқылы қоюға немесе Этот e-mail адрес защищен от спам-ботов, для его просмотра у Вас должен быть включен Javascript электронды поштасына немесе Ленин көшесі 143 мекенжайында орналасқан редакциямызға жолдауға болады.
