болашақ ұстаздар мақтаныштарын осылай білдірді
Осыдан екі жылдан астам уақыт бұрын бастау алған «Дипломмен – ауылға!» бағдарламасы жоғары оқу орындарын тәмамдап, белгілі бір мамандық иесі атанған жастар үшін оңтайлы мүмкіндіктер тудыруда. Осы уақыт аралығында қазақтың алтын бесігі болып табылатын ауылдарда еңбек жолын бастауға облысымыз бойынша 1759 жас аттанған. Олардың басым бөлігі - білім беру саласының қызметкерлері. Ауылдың болашағына бей-жай қарамайтын жас буын өкілдерінің легі биылғы жылы да толастамайды.
Бүгінгі таңда ауылдық жерлердің еңбек нарығында педагог мамандар жоғары сұранысқа ие екені белгілі. Осы қажеттілікті өтеу мақсатында Павлодар мемлекеттік педагогикалық институтының 487 түлегі өңірдің ауылдық елді мекендеріне аттанбақ. Оларға әлеуметтік қолдау көрсетуге республикалық бюджеттен 64 миллион теңге бөлінген, ал жергілікті бюджет есебінен жұмсалатын қаржы көлемі 100-500 мың теңгені құрайды. Бұл туралы Ж.Аймауытов атындағы қазақ музыкалы драма театрында өткен «Дипломмен – ауылға!» акциясы барысында белгілі болды.
Ауқымды шараға облыс әкімінің орынбасары Әлия Ғалымова қатысты. Ол Мемлекет басшысы Н.Назарбаевтың биылғы Жолдауында айтылған мақсат-міндеттерді орындауға атсалысатын болашақ мамандардың таңдауын үлгі етіп, еңбек жолын ауылдан бастауды жөн көрген жастарға сәттілік тіледі.
- Елбасы «Ауылдың гүлденуі – Қазақстанның гүлденуі» деп айтқандай, бүгінгі жастарымыздың ауылдық елді мекендерге барып, оның рухани өмірін дамытуға атсалысып жатқанын мақтан етеміз. Еліміздің осындай ұлтжанды қыз-жігіттеріне мемлекет те көмегін аямауда, - деді ол.
Ә.Ғалымованың айтуынша, алдағы уақытта жоғары оқу орындарының соңғы курс студенттері арасында «Дипломмен - ауылға!» бағдарламасын насихаттау мақсатында жаңа бастамалар қолға алынады. Аймағымыздың жоғары білім беру мекемелерінің басшылары мен аудан әкімдерінің дәстүрлі кездесулерімен қоса, тың жұмыстар жүзеге асырылуда. Мәселен, үстіміздегі жылғы қазан-қараша айларында ЖОО-ның түлектері қалаған елді мекендеріне барып, болашақ жұмыс орындарымен танысу мүмкіндігіне ие болады. Осы тұрғыда өңіріміздегі педагогикалық кадрларды даярлайтын ірі оқу орындарының бірі – ПМПИ-де де ауқымды істер атқарылуда. Институттың қолға алуымен айтуынша, қазіргі уақытта облыстың 10 ауданында ресурстық орталықтар ашылған. Бұл орталық аясында құрылған педагогикалық сыныптарда ұстаз мамандығын таңдаған мектеп түлектеріне ақыл-кеңестер беріліп, ақпараттық қолдау көрсетіледі.
Арыстанбек Солтанхан мен Маржангүл Серікханқызы – бір шаңырақтың иелері. Екеуі де - ПМПИ-дің биылғы түлектері. Алдағы уақытта жас отбасы Ақсу ауылдық аумағына қарасты Қалқаман ауылындағы орта мектебінде ұстаздық етпек. «Жұбайым екеуіміз – иісі қазақ аңқыған ауылда туып-өскен жандармыз. Сол себепті, ауылдан бастау алған қызмет – жарқын болашағымызға апарар даңғыл жол деп шештік», - дейді олар. Ал болашақ қазақ тілі мен әдебиетінің мұғалімі Гүлден Хабибуллинова болашағын ауылмен байланыстыруды Отан алдындағы борышы деп санайды.
Ақмарал ЕСІМХАНОВА.
