Кеше Естай атындағы мәдениет сарайында ПМПИ-дің бірінші курс студенттерін студенттер қатарына қабылдау рәсімі өтті. Салтанатты жиын барысында «Студент антын» 958 студент қабылдап, Павлодар мемлекеттік педагогикалық институтының студенттері атанды. Жыл сайын дәстүрлі түрде өткізілетін шараға ПМПИ-дің ректоры, т.ғ.д, профессор Жанмырза Нұрмағамбетов қатысып, студенттер қауымына ақ жол тіледі.
- Құрметті студенттер, сендер еліміздің ең үздік жоғарғы оқу орындарының бірінде оқып, студенттік қатарға қабылдандыңдар! Сендер болашақта өздеріңе биік мақсат қойдыңдар, ол – мамандық алу, ғылыми жаңашылдықтарды ашу. Ал Павлодар мемлекеттік педагогикалық институты сіздер үшін бұл мақсаттарды жүзеге асыруға мол мүмкіндіктерді жасап отыр, - деді ол.
Студенттер қатарына қабылдау салтанаты институтқа алғаш қадам басқан студенттер үшін маңызды сәттердің бірі екені сөзсіз. Мерекелік кеш өңіріміздің өнерпаздары қатысуымен өткен концеттік бағдарламаға ұласты.
А. ӘДІЛБЕК.
