Павлодар қалалық әскери комиссариаты ғимаратының алдына өңшең жас жігіттер қаз-қатар сап түзеген. Әскери киім киіп, сымша тартылған артиллерия әскерлерінің капитаны: «Мен 185-ші артиллерия полкіненмін. Өзім қызмет жасайтын әскери бөлімге орта білімді, денсаулығы мықты жігіттерді оқу батареясына іріктеп алуға келдім. Онда екі жыл білім алып, «артиллерияның кіші лейтенанты» деген шенмен елдеріңе ораласыңдар,» - деді.
Осылайша таңдалып алынған болашақ Отан қорғаушылар поезбен еліміздің Шығысына бет алды. Манчжурия шекарасы. «Таңсықбұлақ» деген жер. Құдайберген сынды жігіттер 185-ші артиллерия полкінің оқу батареясына қабылданады. Құдайберген Сұрағанов оқу батареясының командирі аға лейтенанттың алдына келіп: «Сізге айтар тілегім бар, рұқсат етсеңіз», - дейді.
- Айтыңыз, жолдас курсант, - дейді комбат ерекше бір кішіпейілділік танытып.
- Мен орыс тілін жетік білмеймін. Игеруі аса күрделі артиллерияның қыр-сырын орыс тілінде оқып үйрену маған қиын, - деп бүкпесіз шындығын айтқан жас жауынгерге: «Орыс тілі - үйренуге өте оңай тіл. Әрі бәріміз де жатсақ-тұрсақ, орысша сөйлеп жүрміз ғой. Ертең-ақ үйреніп аласың. Мен егер жастарды сынай білсем, сенен түбінде жақсы артиллерияшы шығады. Табаныңды жалтырат та, класыңа бар!» – деген екен тәжірибелі батарея командирі.
Еркін МУНДУИНОВ.
(Материалдың толық нұсқасын «Сарыарқа самалы» газетінің 2011 жылғы 16 маусымындағы номерінен оқи аласыздар)
