Биыл Абай Құнанбаевтың туғанына 165 жыл толды. Ұлы ақынның туған күнін атап өтуге барша қазақстандықтар атсалысты.
Қаладағы № 12 балабақша да осы бір үлкен іс-шарадан тыс қалмай, ұлы ақынға арнап ертеңгілік өткізді. Бұл күні ән-күй мұғалімі Әсет Оразбекқызы күй шертсе, балабақша тәрбиешілері Е.Бессарабова, Л.Құсайынова, Л.Фокина, М.Жүнісова, Қ.Егінбаева, Б.Қабдулова, С.Айтқожина Абайдың өлең жолдарын оқып, «Көзімнің қарасы» әнін шырқап, іс-шараны қыздыра түсті. Бүлдіршіндер болса Абай аталарының жыл мезгіліне арнаған тақпақтарын, нақыл сөздерін кезек-кезек жатқа айтты. Сонымен қатар, балалар «Достық» әнін шырқап, «Айгөлек» биін мың бұрала биледі. Бұл іс-шараны ұйымдастырушылар – балабақшаның қазақ тілі мұғалімдері Айгүл Тілегенова мен Ақмарал Жағыпарова. Ертеңгіліктің соңында Абай ауылының әжесі, балабақшаның медбикесі Орынтай Рақымбекова ақ батасын беріп, тәттіден шашу шашып, елге құт-береке тіледі.
Шамшат ЖҮНІСҚАЛИ.
Ақсу қаласы.
Пікірлер
RSS лента .