Павлодар облыстық көркемсурет музейінде ашылған М*АРТ жобасының көрме вернисажы осылай аталды. Дәстүрлі шара Қазақстан Республикасы Тәуелсіздігінің 20 жылдығына арналды.
Аталмыш жобаның он екінші көрмесіне қаламыздың жас суретшілері мен фотосурет-шілерінің қиялы мен шығармашылығынан туған жеке шығармалар қойылды. 150 туынды сызба, мүсін, қолданбалы сән өнеріне тиесілі болса, қалған 70-і - жас фотосуретшілердің шығармашылық жұмыстары.
Ұйымдастырушылардың айтуынша, мұндай шара өнерлі жастар арасында бәсекелестікті арттырып, олардың шығармашылығын ұштайды. «Жобаның негізгі мақсаты - өнер жолын таңдаған ұл-қыздарға шығармашылық қабілеттерін дамытуға ықпал етіп, түрлі деңгейдегі байқаулар мен көрмелерге қатысуға жәрдемдесу», - дейді олар.
Көрме жас ұрпақ пен аға буын арасындағы көпір іспеттес. Себебі, вернисажға тек жастар қауымы ғана емес, сондай-ақ М*АРТ жобасын бастаған Евгений Фридлин, Татьяна Чевтаева, Александр Ерашов, Зура Асылғазина сынды өңірге танымал суретшілер қатысты. Көрме сәуір айының он екінші жұлдызына дейін жалғасады.
А.ӘДІЛБЕК.
