Сарыарқа самалы

Таяуда Павлодар қаласындағы музыкалық колледждің дарынды балаларға арналған музыкалық мектеп интернаты кешенінде Тәуелсіздігіміздің 20 жылдығына орай мектеп оқушылары арасында 45-ші облыстық фестиваль өтті. Аймағымыздың жас музыканттары ішекті, үрмелі және соқпалы аспаптардағы шығармаларды асқан шеберлікпен орындап, көрермендер қауымын тәнті етті. Олардың орындаушылық шеберліктерін дарынды балаларға арналған музыкалық мектеп-интернатының директоры В.Денисенко бастаған білікті педагог-мамандар бағалады. Қазылар алқасының шешімімен Павлодар қаласындағы дарынды балаларға арналған музыкалық мектеп-интернатының Д.Владовский (соқпалы аспап), О.Қуанышев (скрипка), Р.Нұртазин (валторна), М.Адамова (скрипка) сынды өнерлі өрендері мен №3 балалар музыка мектебінің оқушысы Я.Кучерявых (виолончель) бірінші орындарды ұтып алды. Үздіктердің үздігі атанып, жеңіс тұғырынан көрінген жастар бұл байқаудағы жеңістерін ел Тәуелсіздігінің 20 жылдығына арнағандарын айтты.