Дирижер Виктор Шейкин басқарған Павлодар облыстық джаз оркестрі өз концертін Қазақстан Республикасы Конституциясының қабылданғанына 15 жыл толу мерейтойына арнады. Асқан шеберлердің орындауындағы лирикалық әуендер мен классикалық джазды көрермендер зор қуанышпен қабылдағандарын жасырмады.
Оркестр жетекшісі Виктор Шейкин өңдеген соғыс жылдарына арналған әндер мен Кира Шейкинаның орындауындағы джаз әуендері павлодарлық жамағатты тәнті етті. Әсіресе, Құрманғазының «Балбырауын» күйін джаз нақышына салып орындаған Жасқайрат Орынбаев пен Оксана Петрушкина қошеметке бөленді. Сондай-ақ, оркестрдің орындауындағы «музыкалық коллажы» да тамаша орындалды.
Классиканы, лирикалық эстрада музыкасын орындаған джаз оркестрі жаңа маусымның ашылуына дайындалып жатыр екен.
Ақмарал ЕСІМХАНОВА.
