Жуырда Ресей астанасы Мәскеу қаласының төртінші Тверск-Ямск көшесінің 26-үйінде орыс әдебиетіне өзіндік із қалдырған, жерлес ақын Павел Васильевтің ескерткіш тақтасы ашылды. Аталмыш мекенжайда орналасқан үйде ақын жұбайы Елена Вяловамен тұрған. Тағдырдың соқпақ жолына түсіп, сергелдеңге ұшыраса да, бойын қайғыға жеңдірмеген ақын осы үйге хат жолдап, өзінің әзіл өлеңдерімен жаны жабырқаулы Еленаны жұбатқаны тарихтан белгілі.
Бұл – Ресей елінде жерлес ақынның құрметіне арналған жалғыз ескерткіш тақта емес. Павел Васильевтің ескерткіш тақталары Омбы қаласында да бар. Аталмыш қаланың қазіргі «Рабочий путь» газеті редакциясының ғимаратында орналасқан тақтада: «Бұл үйде 1927-1930 жылдары орыс ақыны Павел Васильев болған» деген белгі бар.
Айгүл ҚАЗБЕКОВА,
Павлодар облыстық П.Васильев атындағы мұражай үйінің қызметкері.
