облыстық басылым ұжымы Павлодар ауданында болды
Облыстық «Сарыарқа самалы» газетінің ұжымы осы аптада шығармашылық кешпен Павлодар ауданына қарасты Шақат ауылында болды. Облыстық басылым өңір тұрғындарының қашанда жанынан табылатын, сырлас серігі екендігін тағы бір танытты.
Ел Тәуелсіздігінің 20 жылдығы қарсаңында газеттің балалар мен жастарға арналған қосымшалары - «Айналайын» мен «ЖАС times»-тың бетінде жарық көрген мақалалар іріктеліп, жинақ жарық көрген болатын. Павлодар ауданы ауылдарынан жиналған жұртшылық алдында аталмыш жинақтардың тұсауы кесіліп, бірнеше данасы жергілікті кітапхана қорына, мектептерге табыс етілді. Сондай-ақ, «Айналайынның» аудан бойынша жас тілшілері басылым тарапынан марапатқа ие болды. Балалардың қамқоршысы, қолдаушылары - ата-аналары да марапаттан құралақан қалған жоқ. Ал аудандық «Заман тынысы» газетінің редакторы Роза Мұстафина «Сарыарқа самалымен» тұрақты әріптестік байланыстар үшін марапатталды.
Кеш барысында жиналған жұртшылықпен қызықты ойындар ұйымдастырылып, басылым мен оның тарихына байланысты сұрақ-жауап өткізілді.
Әсем ән мен шуақты жыр төгілген шығармашылық кештің құрметті қонағы, ұзақ жылдар «Сарыарқа самалында» қажырлы еңбек еткен аймағымызға белгілі қаламгер Бақыт Баймұратұлының тағылым мен танымға толы, терең сырлы әңгімесі жұртшылықты ерекше баурап алды. Қазақ халқы тарихының әр кезеңінен ой тербеген ардагер газеттің қашан да елдің көзі мен құлағы, қоғамға бойлап, тани түсетін айнасы екенін баса атап өтті.
Павлодар аудандық ішкі саясат бөлімінің бастығы Қайрат Қабылбеков шараға арнайы қатысып, көпшілікті алдағы мерекемен құттықтады.
Көңілді өткен кеште Шақат ауылының әкімі Темірболат Қанкин: «Облыстық басылым - қашан да біздің үйіміздің төрінен табылатын сүйікті газетіміз. Жыл сайынғы жазылу науқанына біздің ауыл тұрғындары барынша белсенді түрде атсалысады» - деді.
Шара соңында жұртшылық тілшілермен бірге «Атамекен» әнін қосыла шырқап, өнерпаз журналистерге алғыстарын жеткізді!
Жарқынбек АМАНТАЙ,
Павлодар ауданы.
Облыстық «Сарыарқа самалы» газеті тарапынан марапатқа ие болған оқушылар мен олардың ата-аналары:
Жоламан Ахметов, 5-сынып оқушысы, Коряковка ауылы.
Анасы Анар Ахметова.
Зарина Бычелова, 5-сынып оқушысы, Коряковка ауылы.
Анасы Айгүл Хамзина.
Нұржан Байызбаев, 5-сынып оқушысы, Красноармейка ауылы.
Анасы Гүлсім Байызбаева
Жанель Нарботаева, 6-сынып оқушысы, Заңғар ауылы.
Анасы Маржан Шәріпова.
