Ауданның жұмыссыз жүрген азаматтарын қолдау, көмек көрсету мақсатында елді мекендерде ашылған орталықтарда 60 тұрғын еңбек етуде. Олардың бірқатары бау-бақша өнімдерін отырғызып, оны күтіп-баптау жұмыстарын өз мойындарына алған. Ал қалғандары бюджеттен бөлінген қаражатқа ірі қара мал, үй құстарын және қоян сатып алып, асырауда. Мысалы, Ертіс ауылындағы орталықта жұмыс істеп жатқан 7 адам бау-бақша өнімдерінен басқа әлеуметтік бөлім арқылы бөлінген қаражатқа үш жүзден аса тауық, үйрек, қаз балапандарын, бұзауларды сатып алған. Аудан орталығында бау-бақша шаруашылығымен айналысатын кейбір тұрғындар қазірдің өзінде-ақ алғашқы өнімдерін алып отыр. Мұндай мақсатты жұмыстар екі қолына бір күрек таба алмай отырған жұмыссыз тұрғындарға үлкен қолдау екендігі сөзсіз.
Қ.ҚАЛИАҚБАРОВ,
Ертіс ауданы.
