Жуырда Көктөбе ауылындағы аудандық орталық мешітте ораза ұстап, ауыз бекіткен азаматтарға арналып, ауызашар берілді. Аталмыш игі шараға аудан әкімі Н.Пішенбаев бас болып, барлық мекеме басшылары мен ұжымдары бір кісідей атсалысты. Оған ауданнан екі жүздей адам қатысты. Бірқатар ауылдың әкімдері, имамдары және ауыл ақсақалдары ауызашар шарасына қатысып, елмен бірге намазға жығылды. Осынау сауапты іске «Жанашыр» қайырымдылық қоры, Көктөбе ауылдық әкімшілігі ұйытқы болды. Ауыл тұрғындары Лариса Таипова мен Ділдә Құмарханова жеке дастарқан жайып, имандылыққа бетбұрған жамағатқа қызмет көрсетті. Аталмыш елдімекендегі «Қожабек» мешітінің бас имамы Берік қажы Тұяқұлы өнегелі уағыздарын айтып, ата-баба аруағына құран бағыштады. Ауызашарды ұйымдастыруға мұрындық болған азаматтарға тұрғындар ризашылықтарын білдірді.
С.МҰХТАРОВ,
Май ауданы.
