Жақында аудандық ақпараттық-насихаттық топтары халық арасында түсіндіру, үгіт-насихаттық жұмыстарын жүргізу мақсатында селолық округтерде болды. Тақырып – Еуропаның ынтымақтастық және қауіпсіздік ұйымына мүше елдердің Сыртқы істер министрлері кеңесінің 3-тамызда қабылдаған Астана қаласында 2010 жылдың 1-2 желтоқсанында Саммит өткізу туралы шешімі. Мұндай деңгейдегі Халықаралық басқосу – бұл бүкіл әлемге біздің қоғамымыздың басты құндылықтарын – толеранттылықты, дәстүрлерді құрметтеу, сенім және өзара түсіністікті көрсетудің теңдесі жоқ мүмкіндігі деп ұғу қажет. Екінші мәселе Қазақстан Республикасы Конституциясының қабылданғанына 15 жыл толуына байланысты болды. Сонымен қатар, таяуда ауданымызға 5 адамнан құралған облыстық ақпараттық-насихат тобы келді. Павлодар облысы көлік басқармасының бас инспекторы Ж.Асан Қожамжар ауылының тұрғындарымен кездесті. Балалар құқығын қорғау жөніндегі департамент директоры Г.Науразбаева, «Эльбрус» кабардин-балкар және қарашай-шеркес ұлттық-мәдени бірлестігінің өкілі М.Байрамқұлова Барлыбай мен Андрианов ауылдарының халқымен жүздесті. Павлодар облысы мәдениет басқармасының бастығы Қ.Кәрімов Мүткенов селолық округіне қарасты Жаңабет ауылына барды, ал мемлекеттік-санитарлық эпидемиологиялық қадағалаудың Павлодар облыстық департаменті директорының міндетін атқарушы Қ.Бейсебаев Приречен селолық округі Жоламан ауылының тұрғындарымен жиын өткізді. Олардың жасаған баяндамаларының тақырыбы да Ата Заңымыздың мерейтойына байланысты болды. Ақпараттық-насихаттық топ мүшелері халықпен пікір алмасып, тұрғындардың сауалдарына толық жауап берді.
Б.БАШИКОВА.
