29 қараша «Бейбітшілік белдеуі». Бейбітшілік күні.
Береке бастауы
Биылғы жылы еліміз Тәуелсіздіктің 20 жылдығын атап өтуде. Осы уақыт ішінде Қазақстан Біріккен Ұлттар Ұйымының қағидаларын берік ұстанды. Қазақстан - ядролық қарудан өз еркімен бас тартқан әлемдегі бірінші ел болып табылады деп ауыз толтырып айтуға болады.
Еліміздің бейбіт өмірге жол бастауының алғашқы қадамы - әлемдегі ең ірі Семей ядролық полигонын жабуы. 1991 жылдың 29 тамызында орын алған осынау тарихи оқиға мемлекетіміздің дүниежүзіндегі жаңа ядролық қарусыз елдердің біріне айналып, жаһандық бейбітшілік пен тұрақтылықты қамтамасыз етуге қосқан ұлы үлесі болды. Сол сәттен бастап Қазақстан «Бейбітшілік эпицентрі» атанды. Ал екінші қадамы - 1993 жылы Қазақстан ТМД-да алғашқылардың бірі болып ядролық қаруларды таратпау жөніндегі келісімшартқа үн қосуы. Бүгінгі таңда бейбіт еліміздің дана басшысының осындай бастамалары халықаралық қауымдастықтан қолдау тауып келеді.
А.ЕСІМХАНОВА.
30 қараша «Келісім». Ел бірлігі күні.
Ауызбіршілік – басты құндылық
Еуразия құрлығының ортасынан орын тепкен кең байтақ Отанымыз - келісім мен бірліктің, құт пен берекенің, ынтымақ пен ырыстың киелі ошағына айналды.
Бейбітшілік пен жасампаздықтың 20 жылында елдігімізді айғақтайтын қазақстандық құндылықтар қалыптасты. Солардың бірі – ұлттар достастығы мен конфессияаралық келісім. Қазақ жері 130-дан астам ұлт өкілін бір арнаға тоғыстырған қасиетті топырақ. Міне, мызғымас бірлік пен татулықты ту еткен еңселі еліміз Тәуелсіздігіміздің 20 жылдығына бірлігі жарасқан көпұлтты халқымызбен бірге қадам басты. Бірлігі бүтін еліміз Тәуелсіздік мерейтойын экономикалық қуатты, демократиялық дамыған, сондай-ақ, әлем елдері сыйлайтын мемлекет ретінде қарсы алғалы отыр. Ең бастысы – ұрпағымыздың бойында достық пен бауырластық сияқты ізгі құндылықтарды құрмет тұту қалыптасқан.
А.ӘДІЛБЕК.
