Бейсенбі күні облыс әкімі Бақытжан Сағынтаевтың қатысуымен аймақтық үйлестіру кеңесінің кезекті отырысы өтіп, онда «Бизнестің жол картасы-2020» бағдарламасы бойынша ұсынылған жобалар қаралды.
Кеңес мүшелері ең алдымен «Искаков жеке меншік клиникасы» серіктестігінің жобасымен танысты. Медициналық қызмет көрсетумен айналысатын фирма алдағы уақытта омыртқа және тірек-қозғалыс аппараттарына заманауи лазерлік операция жасау технологиясын енгізбек. Бүгінде мұнда 42 маман жұмыс істейді. Ал жаңа жоба қолдау тапқан жағдайда қосымша 4 дәрігер қабылданады. Облыс әкіміне берілген жауабында фирма өкілі мамандардың Мәскеу жерінде тәжірибе жинақтап келгенін айтты. Жаңа қызмет түрінің ақысы да Ресейдегі орталықпен салыстырғанда әлдеқайда арзан. Жобаның құны 56 млн. теңгені құрайды, несие алу үшін «Темірбанк» АҚ филиалына құжаттарын өткізген.
«Альянс банк» АҚ Екібастұз филиалына 300 млн. теңгенің өтінішін берген «Прогресс» ЖШС-нің көздеген мақсаты – жолаушы тасымалына арналған қытайлық және ресейлік автобустарға қол жеткізу. Бүгінде компания облыстың үш қаласында жұмыс істейді. Басқа өңірлерге де жолаушылар тасымалдайды.
«Казтрасткем» және «Казтрасткемикл» серіктестіктері ауыл шаруашылығы саласында инвестициялық жобаларды жүзеге асыруды ойластырған. Алғашқысы қытайлық шикізат негізінде егістікке пайдаланылатын дәрілік құралдар шығаруды жоспарласа, екіншісі құрама-жем өндірісін қолға алмақ. Екі жоба да қысқа мерзімде жүзеге асырылады.
Аталған жобаларды талқылай келе, үйлестіру кеңесінің мүшелері оларды қолдауды жөн деп тапты. Ал «Ромат» фармацевтикалық компаниясының жобасын кейінге қалдырды. Компания салына бастаған фармацевтикалық және медициналық зауыттарға электр қуатын жеткізетін желі тартуды жоспарлаған. Бірақ облыс әкімі зауыттар құрылысы туралы толық мәліметтің аздығын айтты. Сондықтан компания басшылығы алдағы уақытта атқарылып жатқан істер туралы егжей-тегжейлі мәлімдегені жөн. Әзірге үйлестіру кеңесі жедел қарастыруды күткен басқа жобаларға назар аударатын болады. Сөз арасында Бақытжан Әбдірұлы «Бизнестің жол картасы-2020» бағдарламасы аясында кәсіпкерлерге инфрақұрылымдық желілерді салу үшін қаржы алу мүмкіндігі барын ескертіп, алайда ниет білдірушілердің аздығын айтты.
Отырыста «Даму» кәсіпкерлікті қолдау қоры аймақтық филиалының директоры И.Қайырбеков бұған дейін қаралған бес жобаның тиісті органдардың сүзгісінен өткенін, қаржыландыру мәселесі шешіле бастағанын мәлімдеді.
Н.ЖАЙЫҚБАЕВ.
