Сенбі күні Павлодар қаласындағы 5512 ішкі әскер бөлімінің жас сарбаздары салтанатты түрде ант қабылдады. Шараға әскери міндетін өтеушілердің ата-аналары қатысты.
Алматы қаласы, Қаскелең ауданы, Шамалған ауылынан Павлодарға келіп, Отан алдындағы борышын өтеп жатқан Сырым Кенжебаевтың 5512 әскери бөлімде жүргеніне екі айдан асты. Оқу-жаттығу жиынынан сүрінбей өткен ол ата-анасының алдында тұрып, әскери ант қабылдады. «Бүгін - мен үшін ерекше күн. Офицерлердің екі ай бойы үйреткен қимыл-қозғалыстары мен темірдей қатал тәртібін туған-туыстарымның алдында паш еттім. Мұнда келгелі өзімді туған елімнің нағыз патриоты сезіндім. Жаңа достар тауып, өмірдің қатал тәртібіне үйрендім. Ата-анаммен қауышып, айрықша күйге бөлендім. Отанға адал қызмет етіп, дархан даламның тыныштығын сақтауға сақадай саймын»,- дейді Сырым. 5512 әскери бөліміндегі сарбаздардың дені - Оңтүстік Қазақстан мен Алматы облысының өкілдері. Қазіргі таңда мұңда жүз жиырмаға жуық сарбаз бар. Оның тең жартысы салтанатты түрде ант қабылдады.
Е.ҚЫЗДАРБЕК.
