Қыс мезгілінің суық күндерінің бірінде Павлодар қаласының орталық сауда үйінде
жалғыз қалған 2-3 жасар бала табылды. Баланың жалғыз жүргендігі жөнінде полиция қызметкерлеріне сатушының бірі хабарлаған. Оның жоғалғаны туралы ешбір өтініш пен жүгіну келіп түспеген. Полиция қызметкерлері баланың жалғыз екендігіне көз жеткізген соң, толық тексеру жасау үшін облыстық балалар ауруханасына орналастырады. Тексеру барысында оның денсаулығы, жалпы халі жақсы екендігі анықталды. Ал оның ішкі жан дүниесі қандай қалыпта екенін кім білсін. Мөлтілдеген бала көздері анасын ұзақ күтті.
Павлодар облысы ІІД бұқаралық ақпарат құралдары арқылы жоғалған бала туралы бағдарлама көрсеткеннен кейін баланың анасы хабарласады. Полиция қызметкерлеріне жауап беруде анасы баласын неліктен тастап кеткенін айтты. Сөйтсе, жұмысы, ақшасы, тұратын баспанасы жоқтығынан қиналған бейбақ баласын тастап кетуге мәжбүр болыпты. Содан кейін Екібастұз қаласына қарасты Солнечный кентінде шаштараз болып жұмысқа орналасады.
Қазіргі уақытта баласына бей-жай қараған анаға қатысты процессуалдық шешім қабылдануда. Ендігі жерде баланы өзіне қалдыру үшін анасы енді қайтып мұндай әрекетке бармайтынын дәлелдеп, тырысуы қажет болады.
Өмірде осындай аналардың болуы өкінішті-ақ. Олардың күнкөрістің ауыртпалығына бола баласын көшеге тастап кететін безбүйректігіне таң қаласыз...
Бақытжан ЖАҢАБЕРДИНОВА,
Павлодар облыстық ішкі істер департаменті баспасөз орталығының маманы.
