Полиция қызметкерлері 1.sabak.kz сайтында он-лайн режимінде жасөспірімдер арасында орын алатын құқық бұзушылық пен жол-көлік апатының алдын алуға бағытталған сабақ өткізді.
Олар жол-көлік қауіпсіздігін қамтамасыз ету және балалардың қатысуымен болатын жол-көлік оқиғалары жайлы айта келе, қойылған сұрақтарға жауап берді.
Мәселен, бесінші сынып оқушысы Натальяны «Жол инспекторы қандай болуы қажет және ол үшін не білу керек?» деген сұрақ қызықтыратын көрінеді. «Ең алдымен, жол қозғалысының ережесін білу керек. Одан кейін оқу үлгерімі тәуір, физикалық жағдайы жақсы болуы қажет», - деді ІІД Жол полициясы басқармасының ұйымдастыру-аналитикалық және алдын алу жұмыстары бойынша құрылған топтың инспекторы Сәуле Мұқажанова.
Аталмыш сабақта «Неше жастан бастап мотоцикл жүргізуге болады?», «Мектеп бітірісімен көлік жүргізу құқығын алуға бола ма?» деген сұрақтар да қойылды. Полиция қызметкерлері мотоциклді 16, ал автомобильді 18 жастан бастап жүргізуге рұқсат етілетінін айтты. Сондай-ақ, олар жол қозғалысына қатысушылардың, оның ішінде жаяу жүрушілердің жауапкершілігі жайлы ерекше ескертті.
Интернет-сабаққа облыстың 105 мектебінен 3000-нан астам оқушы және мыңға жуық ата-ана мен ұстаздар қатысты. Балалардың айтуынша, олар осы интернет-сабақ арқылы көп нәрсені білген. Оларды кездесудің осы үлгісі қызықтырған. Нақты жағдайлар бойынша мәлімет алған ата-аналар да Интернет арқылы өтетін сабақтарды пайдалы деп санайды.
Осындай ақпараттық-құқықтық сабақтар Павлодар облысында ай сайын өткізілмек.
Ж.БІЛӘЛОВА,
Павлодар қалалық ішкі істер бөлімі баспасөз орталығының маманы.
