Дәл осындай атпен барша мұсылмандардың Құрбан айт мерекесі күні Тілеубай ауылдық клубының меңгерушісі Қымбат Олжабаеваның мұрындық болуымен тағылымы мол кеш өтті. Аталмыш шараға ауылдың қыз-келіншектері, ұлын ұяға, қызын қияға қондырып үлгерген аяулы аналар және мектеп оқушылары қатысты.
- Мереке күні өткізілген кештің басты мақсаты қоғамымыздағы нәзік жандылардың мәртебесін көтеріп, аналарымыз бен апа-әжелерімізді құрметтеу, олардың үгіт-өнегесін келер ұрпаққа дәріптеп жеткізу болып табылады, - деді Қымбат Олжабаева.
Шара барысында аяулы аналар мен қыз-келіншектер үй тұрмысын реттеу, ас мәзірін даярлау, бала тәрбиесі туралы сыр шертісіп, өзара ой бөлісті. Қыз балалар болса өздерін қызықтырған сұрақтарын қойып, қазақтың қыз тәрбиесіне байланысты салт-жоралармен танысты. Тілеубай негізгі мектебінің ұжымы ауылдық клуб меңгерушісінің бұл бастамасын қолдап, алдағы уақытта жалғасын тапса деген тілек білдірді.
Алтынай МАНҒҰТОВА,
Тілеубай негізгі мектебінің мұғалімі,
Қашыр ауданы.
