Сарыарқа самалы

деді аймақ басшысы Ерлан Арын

 

«Үкіметке бір салалы шағын қалаларды дамыту

туралы арнайы бағдарлама жасауды тапсырамын.

Онда қаланың экономикасындағы әрбір нақты бағытты

әртараптандыру, әлеуметтік саланы дамыту ескерілуі тиіс»

 

ҚР Президентінің биылғы Жолдауынан.

 

Елбасы биылғы Жолдауында өңірлерді, әсіресе, шағын қалаларды дамытуға, сондай-ақ, ауылдық жерлерді көркейтуге баса мән берген болатын.

Жолдау жүктеген міндеттерді орындауға бағытталған игі шаралар республиканың барлық аймағында жүйелі түрде қолға алынуда. Бұл ретте, Ақсу қаласында да ауқымды жұмыстардың атқарылып жатқанын атап өткен жөн. Осыған орай, бұрнағы күні облыс әкімі Ерлан Арын металлургтер шаһарының бүгінгі тыныс-тіршілігімен танысып қайтты.

 

 

Қалада даму байқалады

Аймақ басшысы Ерлан Мұхтарұлы алдымен «Еуроазиаттық энергетикалық корпорациясы» акционерлік қоғамының жылу электр станциясында болып, қайта жарақтандырылып жатқан №6 энергоблоктың жұмысымен танысты. Аталмыш корпорация президенті Абдуазим Рустамбаевтың айтуынша, 325 МВт электр энергиясын өндіруге арналған бұл жобаның құны 265 миллион АҚШ долларын құрайды екен. Жоспар бойынша энергоблок келесі жылы іске қосылады деп күтілуде. Ел экономикасы дамыған сайын энергияға деген сұраныс та артуда. Сонысымен де, кәсіпорын мемлекетті өркендетуге үлкен үлес қосуда, деп атап өтті облыс әкімі.

Бұдан кейін Е.Арын Ақсу ферроқорытпа зауытына ат басын бұрды. Кәсіпорын директоры Арман Есенжолов үдемелі индустриялық-инновациялық даму бағдарламасы аясында атқарылған жұмыстар жөнінде сөз етті. Оның айтуынша, зауыт жылдан-жылға қарқынды дамып келеді. Соңғы уақытта кәсіпорын ішінде ашылған агломерат цехының арқасында қалдықсыз өнім шығарып, кен қорын үнемді пайдалануға мол мүмкіндік туып отыр. Бұл алдымен экологиялық мәселелерді оңтайлы шешуге ықпал етуде. Сондай-ақ, іске қосылғанына аз ғана уақыт болған жоғары көмір қышқылды феррохром өңдейтін кешен де ел экономикасын еселеуге ықпал етуде.

Бүгінгі күні 6418 адамды жұмыспен қамтып отырған алып кәсіпорын өз қызметкерлерін тұрғын үймен қамтамасыз ету, демалыс орындарына жолдама беру сынды қамқорлық шараларын да назарда ұстауда.

Атап өтерлігі, Ақсу қаласындағы қос өндіріс мекемесі аталмыш мемлекеттік маңызы зор әлеуметтік жобаларды жүзеге асыруда белсенділік танытуда. Мәселен, «Еуроазиаттық энергетикалық корпорациясы» акционерлік қоғамы ақсулықтар үшін екі қабатты спорттық сауықтыру кешенін тұрғызуда. Жаңа ғимараттың құрылыс алаңында болған аймақ басшысы Елбасы биылғы Жолдауында халықтың дене шынықтырумен және спортпен жаппай айналысуы үшін спорттық инфрақұрылымдардың қолжетімді болуы керектігін тапсырғанын айтып, кәсіпорынның бұл бастамасы өзгелерге үлгі болуы керектігін алға тартты. Нысанды салып жатқан «Нұр-Павлодар» жауапкершілігі шектеулі серіктестігі өкілдерінің сөзіне қарағанда, жаңа кешеннің құрылысы 2013 жылы толығымен аяқталып, пайдалануға беріледі деп жоспарлануда. Сонымен қатар, Е.Арын кезінде жеке меншікке өтіп, құрылысы аяқсыз қалған 108 пәтерлі көп қабатты үйдің ғимаратына да назар аударып, болашақта мұны мемлекет иелігіне қайтарып, тұрғындар игілігіне жарату қажеттігін айтты. «Халықты қолжетімді баспанамен қамтамасыз ету – Жолдау жүктеген маңызды міндеттердің бірі», - деді облыс әкімі.

Ерлан Мұхтарұлы өткен жылдың желтоқсан айында пайдалануға берілген «Балапан» балабақшасын аралады. Мемлекеттік «Балапан» бағдарламасы аясында бой көтерген мекемеде 400 бүлдіршін тәрбиеленуде. Мұнда олардың мектепалды тәлім-тәрбиемен қамтылып, шығармашылық қабілеттерін дамытуы үшін барлық жағдай жасалған. Айта кетерлігі, балабақша балғындарға мемлекеттік тілде ғана тәрбие береді. Соған қарамастан, осындағы тәрбиеленушілердің 30 пайызын өзге ұлт өкілдері құрайды. Бұл – мемлекеттік тілге деген көзқарастың өзгергенін білдіреді, - дейді тәрбиешілер.

Облыс әкімі көркі көз тартқан жаңа балабақшада тәрбиеленіп жатқан бүлдіршіндер игілігіне бес компьютер сыйға тартты.

Е.Арын қаладағы №19 кәсіптік лицейдің жағдайымен де танысты. Мекеме директоры Федор Кисенковтың айтуынша, лицейді бітірген түлектер 100 пайыз жұмыспен қамтылуда. Бұл ретте Ақсу ферроқорытпа зауыты көп ықпал етуде екен. Сондай-ақ, аталған кәсіпорын білім ордасына үнемі демеушілік көмек көрсетіп, жыл сайын 27 миллион теңге қаражат бөліп тұрады. Аймақ басшысы Елбасы ірі кәсіпорындардың кәсіптік-техникалық бағыттағы оқу орындарына қолұшын беруі қажеттігін айтқанын, сондықтан зауыт ұжымының бұл қамқорлығы қуантарлық жағдай екенін тілге тиек етті.

 

 

Жаңа міндеттер жүзеге асады

Бұл күні Ақсу қалалық мәдениет үйінде облыс әкімі Е.Арынның қатысуымен алқалы жиын өтті. Оған облыстық басқармалардың және Ақсу шаһарындағы мемлекеттік мекемелер басшылары, қалалық мәслихат депутаттары мен кәсіпкерлер шақырылды.

Жиында Елбасының шағын қалаларды дамыту қажеттігі жайлы тапсырмасын орындау мақсатында Ақсу өңірінде атқарылуы тиіс жұмыстар жайы сөз болды. Күн тәртібінде мектепке дейінгі тәрбие беру мекемелерінің санын арттыру, қаланы көркейту және тұрмыстық қалдықтардан арылту, сондай-ақ, өңірге қарасты елді мекендер мен ауыл шаруашылығын дамыту, тұрғындарды жұмыспен қамту мәселелері жан-жақты талқыланды.

Ақсу қаласы әкімінің орынбасары Бекзия Ысқақова: «Елбасымыз биылғы Жолдауында «қуатты Қазақстан – бұл әуелі қуатты өңір» екенін атап өтті. Экономикалық өрлеу жолында ең бірінші кезекте жаңа зауыттар, әлеуметтік инфрақұрылымдар мен индустриялық орындардың ашылуы тұр. Осы орайда, кәсіпорындарды да тартып, солардың есебінен мектепке дейінгі ұйымдардың ашылуын жүзеге асыру – нәтижелі іс болар еді»,- деді. Сондай-ақ, ол қазіргі таңда 2-6 жас аралығындағы ақсулық бүлдіршіндердің 66,2 пайызы ғана балабақшалармен қамтылған десе де, кезекте әлі 2 мыңға тарта бала тұрғанын айтты. Осы мәселенің түйінін шешу үшін шаһардағы жеке меншікке өтіп кеткен №8, 10, 20-шы балабақша ғимараттарын қайта сатып алып, жөндеуден өткізу қажеттігін алға тартты. Бекзия Зейноллақызы аймақ басшысына бизнестің әлеуметтік жауапкершілігі аясында осы мәселені оңтайлы шешу үшін өңірдегі кәсіпорындармен меморандум жасауға қолдау көрсетуін сұрады.

Қолжетімді баспана мәселесі және қала аумағын тұрмыстық қалдықтардан арылтып, экологияға жауапкершілікпен қарау керектігі де әңгіме өзегіне айналды.

Елбасы биылғы Жолдауында ауыл шаруашылығы саласын дамытуға ерекше тоқталған болатын. Алқалы жиында Ақсу өңіріне қарасты елді мекендердегі мал, егін шаруашылықтарымен айналысқан кәсіпкерлерге қолдау көрсету, сол арқылы ауыл тұрғындарын жұмыспен қамту қажеттігі сөз болды. Кәсіпкерлер облыс әкіміне өз ұсыныс-талаптарын жеткізді. Мәселен, Дәлелхан Әбдіхалық мемлекеттік «Жайлау» бағдарламасы аясында шеттен келіп жатқан әр оралман отбасына 50 қойдан берсе, олар оның басын көбейтіп, мемлекетке өсімімен қайтаратынын, сол арқылы тұрмыстық жағдайлары да жақсарып, жұмыссыздық мәселесі оң шешімін табатынын айтты. Тіпті, қазіргі таңда қойдың терісі, жүні мен ащы ішегіне Иран, Ресей, Қытай мемлекеттерінен сұраныс бар көрінеді.

Жиында оралман ағайындардың құжаттарына байланысты мемлекеттен шағын несие алуда қиындықтар туындап жататыны да айтылды. Әңгіме барысында бұдан басқа өзекті мәселелер де қозғалды.

Жиынды қорытындылаған аймақ басшысы Е.Арын:

- Елбасы жүктеген міндеттердің бірі - шағын қалаларды дамыту. Осы бағытта Ақсу қаласында қолға алынатын жұмыстардың барлығын қолдаймын. Алдағы уақытта мектепке дейінгі мекемелердің санын көбейтудің жолдарын қарастырамыз. Халықты қолжетімді тұрғын үймен, жұмыспен қамтуға да жіті назар аударылады. Құрылысы аяқсыз қалып қойған үйлерді пайдалануға тапсыруды көпке созбай қолға алу керек.

Халықтың спортпен айналысуға қолжетімділігін қамтамасыз ету қажет. Осы бағыттағы жұмыстарды жандандыруға аймақтағы ірі кәсіпорындар жұмылдырылуы тиіс. Ауыл шаруашылығын дамыту, пайдаланылмаған жер телімдерін іске жарату, әсіресе, ауылдық жерлерде ауызсу мәселесін шешуді дұрыс жолға қою қажет. Бұдан былай Ақсу және Екібастұз қаласын дамытуға басымдық берілетін болады. Осындай жұмыстардың нәтижесінде, болашақта металлургтер шаһары ең жасыл қалаға айналуы тиіс. Сонымен қатар, «Сақтықта қорлық жоқ» демекші, әр мекеме басшысы дағдарысқа қарсы жұмыс жүргізуді де ұмытпағаны жөн, - деді.

Сондай-ақ, Ерлан Мұхтарұлы қаланы дамытудың бас жоспарын жасау керектігін және әр саладағы мәселелерді шешу үшін оған жауапты басшыларға көп кешіктірмей ұсыныс жасауларын тапсырды.

Н.ШОДЫР,

Ақсу қаласы.

 

БҰҚАРАЛЫҚ СПОРТ ДАМИДЫ

Жолдауда салауатты өмір салтын қалыптастыру мен дене шынықтыруға ерекше назар аударылды. Әсіресе, Үкіметке спорттық жаттығу алаңдарын жұртшылыққа тегін әрі қолжетімді етуді ерекше тапсырғанына ерекше қуандым. Бұл - спортсүйер қауым үшін зор қолдау.

Жалпы, Президент жыл сайынғы Жолдауларында аталмыш саланы қалыс қалдырған емес. Әрі еліміз алға қойған сол межелерге сөзсіз қол жеткізуде. Соның арқасында, бүгінде еркін күрес елімізде ерекше дамып келеді. Әсіресе, біздің өңірде небір сайыпқыран азаматтардың жолы ашылды. Әлемдік деңгейлердегі додаларда керекулік жігіттердің талай мәрте асығы алшысынан түсті. Мәселен, алдағы жазда Лондонда өтетін Олимпиада ойындарына да бір палуанымыз еркін күрестен жолдамаға ие болды. Қазір ол жаттығу үстінде. Мұның өзі спорттың қанат жайып келе жатқандығын көрсетпей ме?!

Кейінгі уақытта облыс орталығында бірқатар спорттық алаңдар бой көтерді. Балғын өрендерден бастап, ересек азаматтарға дейін кешкі мезгілде сол алаңқайлардан табылып жатады. Дегенмен, әлі де болса қолдау күтетін жайттар баршылық. Жаңа күрес залдары да салынып жатса, нұр үстіне нұр болар еді. Алдағы уақытта өңір спортындағы жетістіктеріміз еселене түсетініне сеніміміз зор.

Жанат УСИН,

еркін күрестен Павлодар облысының

бас жаттықтырушысы.

 

СЕНІМ - КӘМІЛ, ҮМІТ – ЗОР

Барша қазақстандықтардың денсаулығынан бастап білім алу, жұмыспен қамту, жалақы, зейнетақы мен әлеуметтік төлемдер төлеу, тіпті, тұрғын үй мәселесін де назардан тыс қалдырмайтын Президентке ел риза. Елбасымыз биылғы Жолдауында да көптеген маңызды бастамаларды көтерді.

Кезінде жеке меншіктің қолында кеткен кен байлықтары мен өнеркәсіп орындарын мемлекет меншігіне қайтару бағытындағы жұмыстар қарқынды жүргізілуде. Сондай-ақ, Мемлекет басшысының еліміздің кадрлық әлеуетіне баса мән беріп отырғандығы қуантады. Саны бар, сапасы жоқ мамандарды емес, болашақта халық үмітін ақтай алатын іскер азаматтарды дайындау қажет.

Қазақ халқы үшін ортақ мәселе – ауыл тұрғындарының жай-күйі. Әрине, бұл бағытқа мемлекет тарапынан көп қолдау көрсетілуде. Дегенмен, әлі де жетілдіре түсетін тұстар баршылық. Мысалы, бүгінде ауыл-аймақ тұрғындарының басым бөлігі қорасындағы бір-екі малымен күнелтіп жатқандығы белгілі. Көбісінің жұмысы жоқ. Ауызсу мәселесі де өзекті болып тұр. Елбасы Жолдауы осы мәселелердің шешімі бола алады. Маңызды құжатта айтылған тапсырмалар толық жүзеге асып, әлі талай игілікті істердің куәсі болатынымызға кәміл сенеміз.

 

Теміржан ҚҰЛАТАЙ, зейнеткер.

 

Мақсатымыз - парасатты ұрпақ тәрбиелеу

Елбасының биылғы Жолдауында елімізді биік белестерге жетелейтін мақсаттар айқын көрсетілген. Бұл мемлекетіміздің индустриялық-инновациялық тұрғыдан дамып, зияткерлік әлеуеттің өсуінің, қоғам тұрақтылығының, халықтың әл-ауқатының артуының, болашаққа деген сенімнің кепілі болып табылады.

Дамыған қоғам – бұл біліммен қаруланған, әл-ауқаты жақсы және тату-тәтті өмір сүретін халық. Сондықтан, Жолдауда айтылған мақсат-міндеттер, ең алдымен, жастардың білім деңгейін көтеріп, бәсекеге қабілетті мамандарды дайындауға кең жол ашады.

Аталмыш стратегиялық құжат мемлекеттің жан-жақты дамуының басымдықтарын анықтап берді. Солардың ішіндегі маңыздысы – жас қазақстандықтарды көпұлтты еліміздің дәстүрлерін құрметтеуге, оларды толеранттылық пен қазақстандық патриотизмге тәрбиелеу. Президент Жолдауында бізге, ұстаздар қауымына жауапкершілікті істер жүктелді. Жолдаудың жетінші бағытында: «Оқыту үдерісінің тәрбиелік құрамдасын күшейту керек. Олар – патриотизм, мораль мен парасаттылық нормалары, ұлтаралық келісім мен толеранттылық, тәннің де, жанның да дамуы, заңға мойынсұнушылық» деп атап көрсетілген. Сонымен қатар, Президент көпұлттылық пен көптілділік еліміздің басты артықшылықтары екенін алға тартты.

Облыстық Қазақстан халқы Ассамблеясы жанындағы Ұлттық жаңғыру мектебінің қызметкерлері Елбасы саясатын толығымен қолдай отырып, Жолдауды - алға қойылған міндеттерді жүзеге асырудың маңызды бағдарламасы ретінде қабылдайды. Өскелең ұрпақты қазақстандық патриотизм рухында тәрбиелеп, олардың бойына адамгершілік қасиеттер мен ұлтжандылық сезімдерін қалыптастыру – біздің негізгі мақсатымыз.

Жамал БАЙМАНОВА,

Ұлттық жаңғыру мектебі.

Павлодар қаласы.

 

 

халық денсаулығын жақсарту

Мемлекет басшысы маңызы зор құжатта атап өткендей, отандық денсаулық сақтау саласы жылдан–жылға дамып, бюджеттен бөлінетін қаражат көлемі де ұлғаюда. Мәселен, былтыр осы салаға 631 млрд. теңге бағытталса, алдағы үш жылға 1 триллион 355 млрд. теңге бөлінген. Бұл туралы ҚР Денсаулық сақтау министрлігінің өткен жылды қорытындылап, осы жылға жүктелген мақсат-міндеттерді айқындауға арналған алқа мәжілісінде сөз болды. Сондай-ақ, соңғы кездері осы саланың жұмысына тұрғындар тарапынан көп сын-ескертпелер айтылып келгені белгілі. Енді аталған кемшіліктерді түзетіп, емделушілердің құқығын қорғауға бағытталған іс-шараларды бірлесе атқару үшін республиканың барлық өңірлерінде үкіметтік емес ұйым өкілдерінен құралған қоғамдық кеңес жұмыс істейтін болады.

Денсаулық сақтау саласын дамыту үшін әлеуметтік жобаларды жүзге асырудың маңызы зор. Осы мақсатқа биыл бюджеттен 303 млн. теңге қарастырылған. Ел игілігі үшін жасалып жатқан мұндай жұмыстардың нәтижесінде елімізде ана өлімінің көрсеткіші 1,5 есеге, ал бала өлімі 9,9 пайызға төмендеген. Бұл жөнінде аталған ведомствоның басшысы Салидат Қайырбекова мәлім етті, деп хабарлайды Қазақпарат. Сонымен қатар, биылғы жылы да ана мен бала өлімін азайтуға ерекше мән берілмек. Атап өтерлігі, ана мен бала денсаулығын нығайтып, өмірлерін сақтап қалуға бағытталған іс-шаралар біздің өңірде өз деңгейінде жүзеге асуда. Елбасы Нұрсұлтан Назарбаевтың «Әлеуметтік–экономикалық жаңғырту – Қазақстан дамуының басты бағыты» атты халыққа Жолдауының басым бағыттарын талқылау бойынша жақында өткен облыс активінің жиынында аймақ басшысы Ерлан Арын 2010 жылмен салыстырғанда өткен жылы ана өлімі көрсеткіші екі есеге азайғанын мәлімдеген болатын.

Халықтың денсаулығын жақсарту – мемлекеттік саясаттың басты бағыттарының бірі десек, бұл ретте қазақстандықтардың медициналық қызметке деген қолжетімділігін арттыруға, әсіресе, ана мен бала денсаулығын жақсартуға ерекше мән берілуде.

 

Н.АҚЫТЕГІ.

 

аймақ басшысы осылай деп мәлімдеді

Шағын және орта бизнестің дамуына қолбайлау болып отырған барлық әкімшілік кедергілер алдағы уақытта жойылады. Бұл туралы жергілікті кәсіпкерлермен жүздескен облыс әкімі Ерлан Арын мәлімдеді. Шара Павлодар қаласындағы бизнес-инкубаторда өтті. Оған бірқатар жергілікті шағын және орта кәсіпкерлік субъектілерінің басшылары жиналды. Ашық пікір алмасу түрінде өткен кездесуде бизнес өкілдері көкейлерінде жүрген мәселелерін ортаға тастап, қызықтырған сауалдарын қойды.

- Шағын және орта бизнес ел экономикасын дамытудағы басты басымдықтардың бірі болып табылады. Елбасы Н.Назарбаев аталмыш салаға ерекше көңіл бөлуде. Мемлекет басшысы Қазақстан халқына арнаған биылғы Жолдауында да кәсіпкерлікті қарқынды дамыту қажет екендігін атап өтті. Жалпы, аймағымызда соңғы жылдары шағын және орта бизнес құлашын кеңге жайып келеді. Кәсіпкерліктердің саны, сапасы артуда. Өндірілген өнім көлемі де едәуір ұлғайып келеді, - деді облыс әкімі Е.Арын. Сондай-ақ, аймақ басшысы кәсіпкерлер белсенділігінің өскендігін де атап өтті. Олар үдемелі индустриялық-инновациялық даму, «Бизнестің жол картасы - 2020» сияқты мемлекеттік бағдарламалардың жүзеге асуына белсене атсалысуда.

Кездесуге жиналған кәсіпкерлер мемлекет тарапынан шағын және орта бизнесті дамытуға көрсетіліп жатқан жан-жақты қолдаудың зор екендігін ерекше атап өтті. Дегенмен, әлі де шешімін күткен мәселелер жоқ емес. Бизнес құрылымдарының өкілдері алдарынан кес-кестеп шыға беретін әкімшілік кедергілер туралы сөз қозғады. «Кейде бір құжаттың соңынан бірнеше ай жүруге мәжбүрміз. Мысалы, жалға алынған жер телімін ресімдеу үшін бірталай мемлекеттік мекемелердің табалдырығын тоздырып, бір жылға жуық уақыт жүрдік. Барлығы бір-біріне сілтейді», - дейді «Эврика-Павлодар» ЖШС директоры Құрышбек Наурызбаев.

Жиын барысында мұның жалпыға ортақ мәселе екендігі анықталды. Аймақ басшысы әкімшілік кедергілердің жуық уақытта жойылатындығын жеткізді. «Ол үшін арнайы комиссия құрылатын болады. Әр деңгейде, түрлі салада артық қағазбастылық пен әуре-сарсаң, бюрократиялық бөгеттерге жол берілмейді. Өздеріңіз де жұмыстың қаншалықты жеңілденгендігін байқайтын боласыздар», - деді Ерлан Мұхтарұлы.

Облысымызда құрылған еркін экономикалық аймақ көптеген кәсіпорындар үшін өз өндірісін одан әрі дамытудың таптырмас мүмкіндігіне айналмақ. Сол себепті, өңіріміздің бизнес құрылымдары еліміздегі химиялық кластерді кеңінен дамытуға бағытталған аталмыш бірегей жобаның қатысушылары атануға асық. Олардың бірі - «ҚазБытХим» компаниясы. Облыс әкімі еркін экономикалық аймаққа қатысушылардан нақты, тың инвестициялық жобалар талап етілетінін ескертті.

Шараға қатысушылар бірқатар кәсіпкерліктерге ортақ басқа да мәселелерді көтерді. Солардың бірі – қоғамдық көліктерге қатысты. Дәлірек айтқанда, Павлодар қаласының солтүстік, орталық, шығыс өнеркәсіптік аймақтарына қоғамдық көліктер қатынамайды. Ал түрлі кәсіпорындар молынан шоғырланған аталмыш аймақтарда мыңдаған адамдар еңбек етуде. Олар үшін жұмысқа барып-келу үлкен мәселеге айналып отыр. Әсіресе, қазіргідей аязды күндері жағдай қиындай түсуде. Ерлан Мұхтарұлы аталған проблеманы қала басшылығына үш күннің ішінде шешуді тапсыратындығын айтты.

Кездесу барысында көтерілген басқа да өзекті мәселелер облыс әкімінің бақылауына алынды. Е.Арын кәсіпкерлердің өтініштерін, ұсыныс-тілектерін қашанда тыңдауға даяр екенін жеткізді. Бұл ретте, аймақ басшысының интернеттегі виртуалды қабылдауына да сауал жолдауға болады. Облыс әкімі виртуалды қабылдау жүйесін құруды кәсіпкерлік және өнеркәсіп басқармасының басшылығына да тапсырды.

Шара соңында кәсіпкерлер толғақты мәселелерді тыңғылықты түрде шешуге кіріскен аймақ басшысына өз алғыстарын білдірді. Кәсіпкерлердің тілегі ескеріле отырып, бұдан былай кездесу шаралары неғұрлым жиі өткізіліп тұратын болды.

Данияр ЖҰМАДІЛОВ.

 

деді аймақ басшысы Ерлан Арын облыс активінің жиынында

Кеше облыс әкімі Ерлан Арынның төрағалық етуімен Елбасы Нұрсұлтан Назарбаевтың «Әлеуметтік–экономикалық жаңғырту – Қазақстан дамуының басты бағыты» атты халыққа Жолдауының басым бағыттарын талқылау бойынша облыс активінің жиыны өтті. Оған Қазақстан Республикасы Парламенті Сенатының депутаттары, облыстағы департаменттер мен басқарма басшылары, сондай-ақ, қала және аудан әкімдері, үкіметтік емес ұйымдардың, ақпарат құралдарының өкілдері қатысты.

Алқалы жиында аймақ басшысы Жолдау жүктеген міндеттерге кеңірек тоқталып, таяуда жүзеге асуы тиіс нақты тапсырмалар берді.

- Жақында ғана Ұлт Көшбасшысы Нұрсұлтан Әбішұлы Назарбаев Қазақстан халқына арнаған Жолдауын жария етті. Әрбір қазақстандық үшін маңызы зор бұл құжатта еліміздің алдағы уақытта кезек күттірмей жүзеге асыруы тиіс басым бағыттарына ерекше мән берілді. Әсіресе, төрткүл дүниені түгел дүрліктіріп тұрған жаһандық дағдарыс қарсаңында данышпан халқымыздың «Төртеу түгел болса, төбедегі келеді» деген қағидасын бекем ұстанып, бірлігімізді, тұтастығымызды нақты істермен дәлелдеуіміз керек. Елбасымыз жүйелі жұмыстың, нақты істердің он бағытын айқындап берді.

Ең алдымен экономикалық табыстар мен қоғамдық игіліктерді қамтамасыз ету, сол арқылы отандастарымыздың әл-ауқатын арттыра түсу мәселесі – алдағы он жылдықтағы ел дамуының басты бағыты болмақ, - деп бастады өз баяндамасын облыс әкімі Ерлан Арын. Сондай-ақ, ол Павлодар өңірі республикадағы ірі индустриялық орталықтардың бірі болғандықтан, аймаққа жүктелетін жауапкершіліктің де салмақты екенін тілге тиек етті.

- Қазақстанды қуатты мемлекетке айналдыру үшін өңірімізде жүзеге аса бастаған ірі индустриялық-инновациялық бағдарламаларды сәтті жалғастыратын боламыз. Жаңа жұмыс орындарын ашу арқылы әлеуметтік маңызы зор мәселелерді шешуге ықпал ете аламыз.

Бәсекеге қабілетті ауыл шаруашылығы тауарларын өндіру – заман талабы. Мемлекет ауыл шаруашылығына орасан көмек көрсетіп отыр. Алдағы уақытта да солай бола бермек.

Білім беру, денсаулық сақтау салаларында озық технологиялар жетістігі барынша пайдаланылатын болады. Кадрларды қайта даярлау, жастар саясатын жүзеге асыру Жолдаудың басымдықтарының бір тармағы ретінде қарастырылады, - деп атап өтті аймақ басшысы. Сонымен қатар, Е.Арын әр салаға жеке тоқталып, атқарылып жатқан жұмыстар мен алдағы уақытта қолға алынатын міндеттерді айқындады.

Облыс әкімі алдымен еліміздің экономикасын дамытуға үлес қосып, халықтың әлеуметтік-тұрмыстық жағдайын жақсарту қажеттігін айтты. Бұл бағытта жүзеге асып жатқан үдемелі индустриялық-инновациялық даму бағдарламасының маңызы зор екені айқын.

Қазіргі таңда аталмыш бағдарлама аясында аймақта 169 инвестициялық жоба іске асырылуда. Ол үшін 1202,7 млрд.теңге көлемінде қаражат қарастырылған. Былтыр аталған жобалардың 54-і жүзеге асқан. Нәтижесінде, 870 жұмыс орны құрылған. Ал үстіміздегі жылы 150 млрд. теңге көлеміндегі қаржыға 55 инвестициялық жобаны іске асыру жоспарлануда. Ел экономикасы үшін тиімді осындай жобаларды көбейту үшін шағын және орта кәсіпкерлікті қолдау мәселесі де назардан тыс қалмайтындығы сөз болды. Осыған орай, облыс әкімі тиісті мекемелер басшыларына аймақ кәсіпкерлерінің өнімдерін экспортқа шығару үшін арнайы жоба дайындау қажеттігін және Шығыс Қазақстан облысы мен Ресейдің бірқатар көршілес өңірлерімен серіктестік меморандум жасасу керектігін тапсырды.

Елбасы Жолдауында ерекше мән берілген басымдықтардың бірі – халықты жұмыспен қамту. Осы бағытта жүзеге асып жатқан «Жұмыспен қамту - 2020» бағдарламасының арқасында мыңдаған жұмыссыз азаматтар еңбекпен қамтылып, күнкөріс деңгейі жақсаруда. Аймақ басшысы аталмыш бағдарлама біздің облыста да ойдағыдай орындалып жатқанын атап өтті.

«Осы уақытқа дейін облыста 2056 адам кәсіби және қайта даярлықтан өтіп, біліктіліктерін арттырды. Нәтижесінде 1126 жұмыссыз тұрғын әлеуметтік жұмыс орындарына тартылды. 177 қатысушыға 370,0 млн. теңге көлемінде шағын несие беріліп, олар қолға алған кәсіптерін жалғастыруларына мүмкіндік алды. Жалпы, өткен жылы 21 мыңға жуық адам жұмыспен қамтылды», - деді облыс әкімі. Сонымен қатар, ол қала-аудан әкімдеріне, осы салаға қатысты басқарма басшыларына алдымен отбасыларындағы жұмыссыз азаматтарды әлеуметтік жұмыс орындарымен қамту қажеттігін тапсырды.

Жиында әлеуметтік тұрмысы нашар жандарға атаулы көмек көрсету, кәсіптік білім беру мекемелерін бітірген түлектерді өз мамандығына сай жұмысқа орналастыру мәселелері де қозғалды.

Алқалы басқосуда халықты қолжетімді тұрғын үймен қамтамасыз етуге бағытталған жұмыстар жүйелі түрде жалғасын табатыны айтылды. Осы мақсатта биылғы жылы 126,1 мың шаршы метр тұрғын үй салу жоспарлануда. Атап өтерлігі, қазіргі таңда жалға берілетін 4 тұрғын үйдің құрылысы жалғасуда.

Жолдауда баса назар аударылған басымдықтардың қатарында білім беру, денсаулық сақтау саласы да бар. Облыс әкімі осы салаларда да көп жұмыстар атқарылып жатқанын жеткізді. «Балаларды мектепке дейінгі тәрбиемен қамтамасыз етуге бағытталған мемлекеттік «Балапан» бағдарламасы біз үшін өз жемісін берді. Аталған бағдарлама аясында аймақтағы 2-6 жастағы балғындардың 81 пайызы балабақшалармен және шағын орталықтармен қамтылды. Үстіміздегі жылы Павлодар қаласының Усолка мөлтек ауданында жаңа балабақшаның құрылысын аяқтау және 540 орындық бұрынғы 4 балабақшаның ғимаратын қайта қалпына келтіру, 272 балаға арналған шағын орталықтар ашу жоспарланып отыр», - деді Ерлан Арын.

Жиын барысында аймақ басшысы Елбасының тапсырмасы бойынша осы жылдың соңына дейін облыс орталығында Президенттің интеллектуалдық мектебі ашылатынын, соның арқасында дарынды балаларға ерекше қолдау көрсетілетіндігін, жалпы сапалы білім - елдің индустриялық-инновациялық дамуына бастар сара жол екендігін баса айтты. Сондай-ақ, денсаулық сақтау саласын дамытып, салауатты өмір салтын насихаттау мәселелері де әңгіме өзегіне айналды. Осыған орай, облыс әкімі барлық қала-аудан әкімдеріне әр қала мен ауданның орталығында шағын футбол алаңын салуды, баскетбол, волейбол және спорттың басқа да түрлерін дамытып, тұрғындардың спортқа деген қызығушылығын арттыруға бағытталған жұмыстарды қолға алуды міндеттеді.

Халықтың денсаулығын жақсарту – мемлекеттік саясаттың басты бағыттарының бірі. Бұл ретте, аймақ басшысы облыс тұрғындарының денсаулық жағдайын жақсарту мақсатындағы нәтижелі жұмыстарды атап өтті. «2010 жылмен салыстырғанда өткен жылы ана өлімі көрсеткіші екі есеге азайды. Туберкулез ауруы 7 пайыз, ал қан айналымы ауруларынан болатын өлім-жітім 24,6 пайызға кеміді. Бұл – үлкен жетістік», - деді Е.Арын. Бұл жетістіктерге тоқмейілсімей, алдағы уақытта да осы қарқыннан қалмай жұмыс істеу қажеттігін қадап айтты. Сонымен қатар, салаға жауапты тұлғаларға Елбасы тапсырмасына байланысты онкологиялық аурулардың алдын алуға бағытталған жұмыстарды жандандыруды, дәрігерлердің біліктілігін арттырып, тәжірибе алмасуларына жағдай жасауды тапсырды.

Аймақтың дамуы үшін ауыл шаруашылығы саласын дамыту қажеттігі назардан тыс қалған жоқ. Әсіресе, мал, егін шаруашылықтарын жандандыруға ерекше мән берілетіндігі тілге тиек етілді.

Осылайша, Жолдау жүктеген міндеттерді орындау бойынша өңірдің экономикалық-әлеуметтік дамуын жан-жақты талқылап, басшыларға жаңа тапсырмалар берген облыс әкімі жиын соңында барша азаматтарды бірлесе жұмыс істеуге шақырды.

- Біз ғасырлар бойы арман еткен Тәуелсіздігімізге қол жеткіздік. Баянды өмірдің үшінші онжылдығына қадам бастық. Алдымызда асқар таудай биік мақсаттар тұр. Бірлік бар жерде тірлік болатынын бірге дәлелдеуіміз керек.

Ең бастысы, бізге ата-бабаларымыздан аманат болып қалған ең құнды мұрамыз - бейбітшілік, ауызбіршілік, ел тұтастығы сынды баға жетпес байлықтарымызды бағалай білу қажет.

«Саусақ бірікпей, ине қолға ілікпейді»,- деген қанатты сөз бар. Ендеше, алға қойған зор мақсаттарымызды жүзеге асыруда баршамыз белсенділік танытқанымыз жөн.

Біздің міндетіміз – айқын, алған бағытымыз – дұрыс! - деді Е.Арын.

Облыс әкімінің баяндамасынан кейін өңірдегі әр саланың өкілдері жарыссөзге шығып, Елбасы Жолдауындағы басымдықтарды қолдайтындықтарын жеткізді.

 

Рысқан СВАМБАЕВ,

«Б.Нұржанов атындағы Екібастұз ГРЭС-1 станциясы» ЖШС-нің директоры:

- Елбасы Нұрсұлтан Назарбаев биылғы Жолдауында әлеуметтік-экономикалық саланы дамытудың нақты бағыттарын айқындап берді. Мемлекет басшысы атап өткендей, индустриялық-инновациялық жобалардың әлеуметтік маңызы шексіз. Мәселен, өткен жылы аталмыш бағдарлама шеңберінде 89 миллиард теңгеге 54 жоба іске қосылды. Осының арқасында бір мыңға жуық тұрғын тұрақты жұмыс орындарымен қамтылды. Бұл ретте, Екібастұз қаласындағы Б.Нұржанов атындағы ГРЭС-1 станциясының да үлесі зор екенін атап өткен жөн. Өткен жылы кәсіпорынға 163 қызметкер жұмысқа орналасты. Сондай-ақ, жас мамандарға да барынша жағдай жасалуда. Жыл сайын 50-ге жуық студент кәсіпорынға келіп, өндірістік тәжірибеден өтеді. Назар аударарлығы, ГРЭС-1 станциясы Екібастұз қаласына қарасты ауылдық аймақтардың автокөлік жолдарын жөндеуден өткізуді игі дәстүрге айналдырған.

 

Қайрат ТҰРЛЫБАЕВ,

«Жаңа қала» шаруа қожалығының басшысы, Павлодар ауданы:

- Мемлекет ауыл шаруашылығы саласына орасан көмек көрсетіп отыр. Әсіресе, ауылдық елді мекендердегі ағайынның тұрмыс-тіршілігіне көп көңіл бөлінуде. Аграрлық секторға жыл сайын қомақты инвестиция бөлінеді. Соның арқасында шаруалар шетелдік озық техникалар мен асыл тұқымды түліктерді иеленуге, егістік алқабын арттыруға мүмкіндік алды. Мәселен, өзім басқарып отырған «Жаңа қала» шаруа қожалығы өткен жылы жаңа техникалармен қамтамыз етілді. Мемлекет тарапынан қарастырылған қаражатқа бір мың тонналық көкөніс сақтайтын арнайы орын жасақтадық. Егілетін дәнді дақылдардың сапасы мен құрамы жақсарып, жем-шөп қоры молая түсті. Дегенмен, мамандар тапшылығы аталмыш саланың дамуына қолбайлау болып отыр. Жоғары оқу орындарын тәмамдаған жастар ауылдық жерлерге келе бермейді. Тіпті, «Дипломмен – ауылға!» бағдарламасымен жолдама алатындардың дені орта мектептер мен денсаулық сақтау мекемелеріне жұмысқа тұрады. Егер білікті мамандармен қамту мәселесі оң жолға қойылса, өңіріміздегі ауыл шаруашылығы саласы да алға басады.

Ерлан ҚҰСАНОВ,

«Компания Нефтехим LTD» ЖШС директоры:

- Біздің кәсіпорынның ашылу салтанаты ел Президенті Нұрсұлтан Назарбаевтың қатысуымен өткен болатын. Мемлекет басшысы сол жолы зауыттың қызметін жоғары бағалады. Шетелдік заманауи техникалармен қамтамасыз етілген кәсіпорын- дағы жұмыстың бәрі автоматтандырылған. Өнімнің сапасын арнайы зерттеу орталықтары байыптап, қадағалайды. Бүгінгі таңда зауыттың өнімдеріне шетелдік әріптестеріміз қызығушылық танытып отыр. Жылдан-жылға жұмыс көлемі ұлғайып келеді. Елбасының биылғы Жолдауында айтылған индустриялық-инновациялық жобаларды жүзеге асыруға біздің кәсіпорын өз үлесін қосады деген сенімдемін.

 

Александр ТЕРЕНТЬЕВ,

«Стальмонтаж» ЖШС директоры, облыстық мәслихаттың депутаты:

- Біздің кәсіпорын құрылыс жұмыстарымен айналысады. Бұған дейін көптеген ғимараттар салып, халық игілігіне тапсырдық. Елбасы биылғы Жолдауында тұрғындарды қолжетімді баспанамен қамтамасыз ету керектігін айтты. Осыған байланысты біз де биылдан бастап тұрғын үй салуды қолға алатын боламыз. Тұрғын үйлердің көп болуы жастар үшін ауадай қажет. Жастар ел ертеңі екенін ескерсек, әлеуеті жоғары кәсіпорындардың барлығы баспана салу мәселесін назарға алуы тиіс.

Жолдауда айтылғандай, еліміздің ұстанған бағыты дұрыс, бағдары бекем. Сондықтан еліміздің ертеңі үшін Президент жүктеген мақсат-міндеттерді орындауға әрдайым дайынбыз.

 

Гүлбарам ОСПАНОВА,

Железин аудандық орталық ауруханасының бас дәрігері:

- Қазіргі таңда еліміздегі денсаулық сақтау жүйесі дамып келеді. Бала туу саны артып, адамның өмір сүру жасы ұзарды. Қан айналу жүйесі ауруларынан болатын өлім көрсеткіші 1,7 есеге төмендеді. «Саламатты Қазақстан» бағдарламасының арқасында біршама жағымды жаңалықтардың куәсі болдық. Ауылдық, аудандық жердегі тұрғындардың денсаулығы үнемі қадағалануда. Елбасы биылғы Жолдауында: «Ендігі жерде онкологиядан болатын ауру мен өлімді төмендету мәселесі бірінші кезекке шықпақ»,- деді. Біз қарапайым халықтың денсаулығын сақтау үшін бар күш-жігерімізді саламыз. Ерекше атап өтерлігі, ақ желеңді абзал жандарға барлық жағдай жасалуда. Қатарымыз жас әрі жігерлі мамандармен толысып келеді. Біз мұны мемлекеттің дәрігерлерге жасап жатқан игілігі деп білеміз. Биылғы Жолдаудағы өзге де бағыттар баршамыз үшін маңызды.

 

Ян МУРАВСКИЙ,

Павлодар мемлекеттік педагогикалық институтының студенті:

- Елбасы Жолдауында, әдеттегідей, жастар мәселесіне көп көңіл бөліді. Бұл - өте қуанарлық жайт. Олардың баспаналы болуына, тұрақты жұмыспен қамтылуына ерекше назар аударылды. Мен елімізде орын алып жатқан саяси оқиғаларға, қоғамдық жұмыстарға үнемі қатысамын. Мемлекет басшысы Президенттік кадр жасағын қалыптастыруға ұсыныстар дайындауды тапсырды. Менің ойымша, осындай келелі бастама біздің өңірімізге де қажет. Бұл алдымен, жастарымыздың саяси сауатын арттырып, жауапкершілікті сезінулеріне ықпал етеді. Екіншіден, аға буын өкілдерінің тәлім-тәрбиесін алған саналы ұрпақ қалыптасады. Біздің өңірдегі жастар саясаты әжептәуір ілгерілеген. Бұған өткен жылы облысымызда ұйымдастырылған түрлі деңгейдегі жастар форумдары дәлел бола алады.

 

Жарыссөзге шыққан кәсіпкерлер мен түрлі сала қызметкерлері Қазақстан Республикасының Президенті Нұрсұлтан Назарбаевтың «Әлеуметтік–экономикалық жаңғырту – Қазақстан дамуының басты бағыты» атты халыққа Жолдауын құптайтындарын айтып, маңызды құжаттағы міндеттердің орындалуына бір кісідей үлес қосатындықтарын мәлімдеді.

 

Н.ШОДЫР,

Ф.ӘМІРЕНОВ.