Қазақстан Республикасының Тәуелсіздік күні қарсаңында облыс әкімі Бақытжан Сағынтаев мемлекеттік қызметкерлердің антын қабылдады. Саяси мемлекеттік қызметкерлер – облыс әкімі аппаратының басшысы Арслан Әбдіқалықов, Ақтоғай ауданының әкімі Жұмагелді Қожанов, әкімшілік мемлекеттік қызметкер - облыстық денсаулық сақтау басқармасының бастығы Ардақ Күзеков салтанатты ант қабылдау барысында аймақ басшысына бар күш-жігерлерін және білімдерін Қазақстан Республикасын дамыту ісіне арнайтындарын, халық пен елге адал қызмет ететіндерін уәде етті.
Облыс әкімі басшыларды өмірдің осы бір маңызды сәтімен құттықтады. «Сіздер еліміздің ең басты мерекесі – Тәуелсіздік күні қарсаңында ант қабылдадыңыздар. Осылайша, сіздерге ерекше сенім артылып отыр. Мемлекеттік қызметкер – бұл тек жоғары мәртебе емес, сондай-ақ зор жауапкершілік», - деп атап өтті аймақ басшысы.
Облыс әкімінің баспасөз қызметі.
