Азаматтық қоғамның айнасын айшықтайтын күн

Жуырда елімізде үлкен саяси дода өтеді деп жоспарланып отыр. Президенттік сайлау еліміз үшін аса маңызды шешімдердің бірі болмақ. Бұл - Қазақстанда тәуелсіздік алғаннан бері өткізілетін жетінші Президенттік сайлау. Осыған орай, әр жылдары сайлауға қатысқан азаматтардың ой-пікірлерін ортаға тоғыстырып, ел тарихындағы саяси оқиғалардың маңыздылығына тоқталдық.

Әділетті қоғамның бастауы болмақ

- Сайлауға барып, дауыс беру - бұл азаматтардың саясат пен мемлекеттік басқаруға атсалысуының ең көлемді әрі нақты қадамы. Сайлау демократиялық қоғамда мемлекеттік жүйенің тиімділігін арттырып, үкімет пен басқарушы саяси партияның саясатын бағдарлайды. Сондай-ақ, мемлекеттің қызметіне қоғамның, яғни азаматтардың бақылау жасауына үлкен мүмкіндік береді. Осы межелі міндеттер атқарылуы үшін сайлау жалпыға бірдей, тең және ерікті түрде өтуі тиіс. Президент сайлауы - еліміздің бірлігі мен тұтастығының, азаматтық қоғамның айнасын айшықтайтын күн. Маңызды оқиға елімізге жаңа серпін әкеліп қана қоймай, болашаққа нық қадам жасауға ықпал етері сөзсіз. Сондықтан барша қазақстандықтарды сайлауға қатысып, өз таңдауларын жасауға шақырамын. Өзім де 63 жасқа толып, зейнеткерлікке шықсам да, еліміз үшін елеулі оқиғаның басы-қасында жүрмін. Бұл менің өмір жолымдағы бірінші сайлау емес. Әр саяси доданың мемлекет үшін қаншалықты маңызды екеніне талай мәрте куәгер болдық. Бұл сайлау да Жаңа Қазақстанның, әділетті қоғамның бастауы болмақ.

Қайрат ШАПУОВ, облыстық мәслихат депутаты.

Белсенділік таныту керек

- Еліміз тәуелсіздік алған жылдардан бері бірнеше мәрте сайлау өткізіп, халық өздерінің еркін таңдауын жасады. Міне, кезекті Президенттік сайлау күні де жақын қалды. Бұл саяси дода саясаткерлер үшін ғана емес, ел тағдырына атүсті қарамайтын барлық азаматтар үшін аса маңызды. Мемлекет басшысы жақында жаңа саяси дәстүрлерді, өзіндік қазақы демократияны қалыптастыру үшін бірқатар реформалар қабылдап, жаңа Қазақстанның даму жоспарын ұсынды. Президент жаңа жүйе қалыптастырып, бір тұлғаға емес, институттарға жұмыс істеу керектігін айтты. Сонда ғана демократиялық, тұрақты жүйесі бар мемлекет болып қалыптаса аламыз. Ең бастысы - алдағы сайлауда белсенділік таныту керек. Себебі, ол - әрбіріміздің ел алдындағы жауапкершілігіміз.

Қазір сайлауалды науқанның тендецияларына назар аудару, оларды бақылау, үгіт-насихат жұмыстары жүргізілуде. Халық Президентікке кандидаттардың бағдарламаларын, жұмыс жоспарын саралап, дұрыс таңдау жасауы керек. Әр азаматтың дауысы зайырлы мемлекеттің даму жолында шешуші рөл атқарады. Осыны қаперден шығармайық.

Рымтай ШӨКЕЕВ, облыстық ардагерлер кеңесінің төрағасы.

Ел тағдырына әсер етеді

- Еліміздің тағдыры үшін аса маңызды саяси науқанда әрбір азамат сайлауға белсенді қатысып, өз дауысын беруі керек деп ойлаймын. Өйткені бұл науқан әр азаматтың өзінің тағдырына ғана емес, ел тағдырына да әсер етпек. Сондықтан әрбір азаматтың дауысы өте маңызды! Мемлекет басшысы: «Біз жаңа кезеңге қадам бастық! Халқымыз жалпыұлттық референдумда саяси жаңғыру бағдарын қолдады.

Конституциялық реформа Жаңа, Әділетті Қазақстанды құру жолындағы аса маңызды қадам болды. Еліміздегі саяси жаңғыру енді экономикалық өзгерістерге ұласуы тиіс» деп өз сөзінде нақты жеткізді. Яғни, Президенттің кезектен тыс сайлауы, мемлекетіміздің оң өзгерістерге ұласып дамуына зор үлес қосады. Ол өзгерістердің барлығына көп ұзамай бүгінгі жас ұрпақ куә болады. Жетпістен асқан шағымда мен әлі де саяси додаларға, ел үшін маңызды оқиғаларға қатысып келемін. Бұл - менің азаматтық борышым. Сайлауға қатысып, өз таңдауымды жасаймын. Бұған жастар да бейжай қарамауы тиіс. Ел тағдырына немқұрайлық танытуға болмайды.

Назымбек ДҮКЕНБАЙ, композитор.

Оқыту курстары жалғасуда

Железин аудандық аумақтық сайлау комиссиясының төрағасы Алтын Кәрімованың сөзінше, аудан бойынша 36 сайлау учаскесі құрылды.

- Бүгінде жалпы аудан көле-мінде 10676 сайлаушы тіркелді. Оның ішінде мүмкіндігі шектеулі 104 азамат, мүлдем жүре алмайтын 9 адам бар. Сәйкесінше, аталған 9 сайлаушының үйіне тұрғылықты мекенжайы бойынша сайлау учаскесінің комиссия мүшелері баратын болады. Атап өтер болсақ, 36 кабинаны облыстық аумақтық сайлау комиссиясы тарапынан аудандық бөлімдерге жақын арада ұсынбақ, - дейді ол.

Алтын Таңжарыққызы сайлау учаскелерінде барлығы 193 комиссия мүшесі жұмыс істейтінін, сондай-ақ оның 7-еуі аудандық, ал қалған 186-сы ауылдық елді мекендерде екенін атады.

- Қазіргі таңда біз комиссия мүшелерін оқыту, семинар және тренингтер өткізумен айналысып жатырмыз. Оған қоса, аудандық деңгейде үлкен семинар өткізуді жоспарлап отырмыз. Бұл жұмыстар 16 қарашаға дейін жалғасады, - деді А.Кәрімова.

М.ТӨЛЕБАЙ, Железин ауданы.

Бақылаушылар дайындықты байқады 

Ақсу қаласы мен оған қарасты ауылдық аймақтарда барлығы 40 сайлау учаскесі құрылып, іске кірісті. Олардың бірқатарының саяси науқанға дайындығын шетелдік бақылаушылар тексеріп үлгерді. 

Сайлау учаскелерінің 18-і ауылда, 19-ы қалада, тағы үшеуі жабық мекемелерде орналасқан. Ақсу қалалық аумақтық сайлау комиссиясының төрағасы Серік Жақыповтың айтуынша, өңірде барлығы 48 983 дауыс беруші бар. Бүгінде сайлаушыларға 50 мыңға жуық шақыру таратылып, көпшілік жиналатын орындарда, подъездерде шақырулар ілінді.

- Әр учаскеде мүгедектігі бар азаматтарға қолайлы жағдай жасау мақсатында пандустар, арнайы бұрыштар, арбамен кіруге ыңғайлы кабиналар, аудио-жазбалар, шрифтер сияқты қажеттіліктердің барлығы қарастырылды.

Бұл ретте сайлау күні учаскеге келе алмайтын қарттар, мүмкіндігі шектеулі жандар 20 қараша күні сағат 12.00-ге дейін дауысты үйден беруге ниетті екенін білдіріп, тиісті учаскеге хабарласып, өтініш қалдыруы қажет екенін еске саламыз, - деді С.Жақыпов.

Учаскелік сайлау комиссиясы мүшелерінің бір тобы жақында тағы оқудан өтіп, тест тапсырып, арнайы сертификаттар алды. Сонымен қатар, осы уақытқа дейін халықаралық ұйымдардан екі бақылаушы келіп, аумақтық сайлау комиссиясы өклідерімен кездесіп, учаскелердің дайын-дығын сүзгіден өткізді. Олардың қорытындысы бойынша, Ақсу өңіріндегі учаскелердің ауқымды саяси науқанға дайындығы жоғары деңгейде.

Қ.ТІЛЕКТЕСҚЫЗЫ, Ақсу қаласы.

Қолайлы жағдай жасалуда

Бүгінде дауыс берушілер өздерінің сайлаушылар тізімінде бар-жоғын «109» - Бірыңғай байланыс орталығына қоңырау шалу арқылы тексере алады.

Шарбақты аудандық аумақтық сайлау комиссиясының төрағасы Юлия Масальскаяның айтуынша, биыл аудан бойынша жасы 18-ге толған 145 жас алғаш рет дауыс бермек.

- Жалпы, елді мекен аумағында 26 сайлау учаскесі құрылды. Атап өтер болсақ, барлық сайлау учаскесі ғимараттардың бірінші қабатында орналасқан. Сәйкесінше, мүмкіндігі шектеулі азаматтарға арналған пандустар, қажетті құлаққаптар, үлкейткіш құралдар мен Брайль шрифті бойынша трафареттермен қамтылды.

Сонымен қатар, қоңырау түймелерімен бірге алынбалы пандустар орнатылды. Бұл санаттағы жандар, бюллетеньді өз бетінше толтыра алмайтын азаматтар өзі сенім білдіретін адамның көмегін пайдалануға құқылы, - деп атап өтті ол.

Оның сөзінше, аудан көлемінде 13 094 сайлаушы бар. Олар дауыс берушілер тізімінде бар немесе жоқ екенін жергілікті атқарушы органның CALL-орталығына немесе 109 нөміріне хабарласу арқылы білуге болады.

М.БАЯНБЕКҚЫЗЫ, Шарбақты ауданы.