Бас дәрігер болу – үлкен жауапкершілік

Бүгінде білім мен біліктілікті, жауапкершілікті талап ететін дәрігерлік саланы таңдап, жас та болса, бас болып жүрген жас мамандардың бары ерекше қуантады. Соның бірі - Май аудандық ауруханасының бас дәрігері Алшынбек Ахтанов. Жақында ғана жаңа лауазымға тағайындалған жас маманмен аз-кем тілдесудің сәті түсті.

- Алшынбек Рашидұлы, медицина саласы жүрек қалауы ма?

- Бала кезімде дәрігер болу туралы ойланбаған екенмін. Кейін ата-анамның қалауымен осы саланы таңдадым. Бүгінде мамандығымды жақсы көремін. Алдыма қайта таңдау беретін болса, ойланбастан қайта дәрігер боламын.

- Қандай жоғары оқу орнын аяқтадыңыз?

- Мен 1990 жылы Шығыс Қазақстан облысында дүниеге келдім. Мектепті аяқтаған соң, 2010 жылы Семей медициналық университетіне «Жалпы медицина» мамандығына оқуға түстім. Араға жеті жыл салып оқуды тәмамдадым. Одан кейін Павлодар және Астана қалаларында еңбек еттім. Бүгінде Май аудандық ауруханасының бас дәрігерімін.

- Сіздің ойыңызша, дәрігер болу үшін не қажет?

- Бұл саланы таңдау үшін адамның бойында осы салаға деген махаббат керек деп есептеймін. Қандай қызмет болсын, өз жұмысыңды бар жан-тәніңмен қалайтын болсаң, жақсы нәтиже шығады. Әріптестерім мен замандастарыма да осыны жиі айтамын. Сонымен қатар, болашақ ақ желеңдінің бойында адалдық, шыдамдылық, білім мен біліктілік те болу керек деп санаймын.

- Жас мамандардың бірісіз. Жуықта Май аудандық ауруханасының бас дәрігері болып тағайындал-дыңыз. Бұл аса маңызды жауапкершілік жүгін алудан қорықпа-дыңыз ба?

- Болмысым бір орынға байланып қалуды ұната бермейді. Сол себепті, «мидағы шеңберді» бұзып, ұсынысты қабылдадым. Тәуекелге бел будым десем болады. Осыған дейін Павлодар және Астана қалаларында еңбек еткендіктен де болар, шешім қабылдау қиынға соқпады. Керісінше, аудандық жерге барып, тәжірибе алмасуды орынды деп білдім. Күні бүгінге дейін жақындарым мен әріптестерім қолдау білдіріп келеді. Мұның да маңызы зор.

- Басшы ретінде ұжымды басқару да оңай емес. Аудандық аурухананың ұжымы ортасында ауызбіршілік пен сапалы қызмет көрсетуді қалай бақылайсыз?

- Дәрігер болу үлкен жауапкершілікті қажет етеді. Ал бас дәрігер болу - екі есе үлкен жүк. Себебі, барлық науқастың денсаулығын қадағалау, маман-дардың қызметіне де көңіл бөлу оңайға түспейді. Десе де, жұмысымды тиянақты әрі сапалы орындауға тырысып келемін. Ал біздің ұжым өте жақсы мамандардан құралған. Айрандай ұйып отырған бір отбасындаймыз. Мінезіміз сан қилы. Десе де, әрбірімен ортақ тіл табысып кеттім. Бір кездері алғашқы тәжірибелік ұстазым «Жұмыстың ең оңайы – оны жақсы орындау» деп жиі айтатын. Уақыт өткен сайын бұл айтылған сөздің дұрыстығына көзім жетіп келеді. Жұмыстағы негізгі қағидам да осы. Қызметті жақсы атқару. Одан басқа әрекетке жол жоқ.

- Бүгінгі таңда Май ауданының тұрғындары қандай шағыммен жиі жүгінеді?

- Аудандық ауруханадағы басты мәселе – кадр тапшылығы. Бірнеше жылдан бері мұнда хирург, лор сынды маман иелері жоқтың қасы. Сол себептен де, қабылдауға жазылып, тексерілуге Ақсу және облыс орталығы Павлодар қаласына баруына тура келеді. Ендігі кезде осы аталған олқылық шешімін тапса, аурухананың қызмет көрсету сапасы жақсарар еді.

- Дәрігердің қателігі орны толмас өкінішке әкелуі әбден мүмкін. Мұндай жағдайларды болдырмау үшін ақ желеңділер алдымен нені ескеруі тиіс?

- Біріншіден, дәрігер науқастың әрбіріне көмек көрсетуге әрдайым дайын болуы керек. Емделушінің құқығына құрметпен қарап, өзінің жоғары дәрежелі коммуникативтік дағдыларын көрсете білгені абзалырақ. Екіншіден, дәрігер өмір бойы өзінің білімін жетілдіріп қана қоймай, заман талабына сай жоғарылатып отыруы қажет.

- Әріптестеріңізге қандай кеңес айтар едіңіз?

- Алдымен науқастың көңілін тауып, жақсы қарым-қатынас орнатуға тырысқаныңыз жөн. Оның жанын қинаған дертті айту - қиын шаруа. Тіпті, дертіне шипа іздеп келген балақай болса, оңайға түспейді. Сол себепті, дәрігермен қатар психолог болуға тиіссіз. Әрине, мұның барлығы тәжірибемен келеді. Десе де, өз ісінің маманы бұл айтылған дүниелерді оңай іске асырады деп ойлаймын. Еміне дауа таппай жүрген жанның көзіне үміт отын сыйлаудан асқан бақыт жоқ. Ақ желеңді екеніңізді мақтан тұтыңыз деп кеңес айтар едім.

- Алдағы жоспарларыңыз қандай?

- Бір қызығы, жоспар құруды ұнат-пайтын адамдардың бірімін. Бұл аймақта қанша уақыт жұмыс істейтінімді дөп басып айту қиын. Жас маманның бірі болған соң, мұнда әлі біраз жыл еңбек етсем деймін. Басты мақсатым – емделушілердің дертіне шипа болып, өз сертіме берік бола білсем, осыдан артық арманым жоқ.

- Сұхбатыңызға рахмет!

Сұхбаттасқан – Махаббат ТӨЛЕБАЙ.