«Күй & джаз» үндесті

Ұлттық өнеріміздің баға жетпес бір бөлігі - дәстүрлі музыка. Ғасырдан–ғасырға мирас болған қасиетті қара домбыраның, қобыз бен сырнайдың үні үйлескен Естай атындағы мәдениет сарайында алғаш рет Рүстембек Омаров атындағы қазақ ұлт аспаптар оркестрінің 15 жылдығына арналған алғашқы «ArTerra bands» джаз бэндімен бірге «КҮЙ & ДЖАЗ» атты концерті өтті.

Аталмыш шара Иса Байзақов атындағы Павлодар облыстық филармониясының Рүстембек Омаров атындағы қазақ ұлт аспаптар оркестрінің 15 жылдығына арналды. Сонымен қатар, оркестрге Рүстембек Омаровтың аты берілгеніне 5 жыл және концерттің бас дирижері Талғат Кәрімовтің өнер сахнасында жүргеніне 30 жыл толып отыр. Осы орайда кеште Моңғолияның үздік музыканты «Күміс ағаш» жүлдегері Орхонбаатор Чинбаттың оркестріміздің бас дирижері Талғат Кәрімовке арналған «Тұлпардың дүбірі» шығармасы қалың көпшілікке ұсынылды. Бұл кеш біздің бұрыңғы концерттерімізден өзгеше. Өйткені, бүгінгі музыкалық керуен сізді ұлттық нақыштан бастау алатын ғажайып күймен тербетіп, әлемдік әуезді джазға дейінгі жанрдағы шығармаларға арқау болды. Бұл кештің өзгешелігі жайлы Рүстембек Омаров атындағы қазақ ұлт аспаптар оркестрінің көркемдік жетекшісі әрі бас дирижері Талғат Кәрімов айтып берді.

– Қазақтың күйі – бір бөлек әлем, джаз – ол бір бөлек әлем. Оркестрімізге 15 жыл, Рүстембек Омаров атағын алғанына 5 жыл, өзімнің сахнада жүргеніме 30 жыл толып отыр. Осының бәрін қосып, ерекше концерт берейік деген ой туындады. Концерттің ерекшелігі – домбырада күй мен джаз шығармаларын бірге орындалуында. Оркестрдегі 45 жанның үндесе орнындағаны көрерменге ерекше көңіл сыйлады деп ойлаймын, – деді Талғат Кәрімов. Концертке қатысқан облыс әкімінің орынбасары Айзада Құрманова мерейтойлармен құттықтап, оркестр ұжымына жылы лебізін жеткізді.

- Қысқа мерзімнің ішінде Талғат Баритұлы және оркестр ұжымы мәдениет саласында ерекше орын алды. Оған дәлел - бірнеше музыкалық сайыстар мен жобаларда жүлделі орындарға ие болуы. Еліміздің еңсесін асқақтатып, мақтанышымызға айналдыңыздар. Ұлттық музыканы кең көрерменге таратып, болашақ ұрпаққа ұлықтау аясында еңселі, нәтижелі еңбектеріңіз үшін ризашылығымды білдіремін, – деді А.Құрманова Арнайы шақырылған қонақтардың бірі, Талғат Кәрімовпен кезінде бірге оқыған, ҚР еңбек сіңірген қайраткері, Ғазиза Жұбанова атындағы мемлекеттік ішекті аспаптар квартетінің жетекшісі Ернар Мыңтаев өз ойымен бөлісті. Музыкалық мейрамда әр жанрларды қамтитын – классика, дәстүрлі, қазіргі саундтрек болып жүрген әндерді оркестрмен ерекше өңдеп орындалуы тыңдарманның жүрегінен шығады деп ойлаймын. Әрине, осындай бағдарламалар бар, бірақ ұлт аспаптар оркестрімен шығару сирек кездеседі, - дейді   Ернар Мыңтаев Концерт Түркештің «Көңіл ашар» күйімен басталды. Сахна төрінде жайғасқан 45 адамнан тұратын оркестр ұлттық нақыштан бастап джазға дейінгі әртүрлі жанрдағы шығармаларын ұсынды. Кеш барысында Рүстембек Омаровтың «Жастық шақ», Нұрғиса Тілендиевтің «Сарыжайлау», Қазақтың халық әні «Япурай», Бақытжан Дүйсенғазиевтің «Ақберен» күйлері, «Либертанго» композициясы, Gipsy Kings «Inspiration» әні және тағы басқа туындылар орындалды. Кеш барысында Талғат Кәрімовке ҚР Мәдениет және спорт министрлігінің Құрмет грамотасы, Жанболат Бастамиевке ҚР Мәдениет және спорт министрлігінің «Мәдениет саласының үздігі» төсбелгісі табысталды. Қазақ ұлт аспаптар оркестрінің әртістері Гүлсім Арсланова, Асхат Әубәкірова, Айвар Нагишпаев Павлодар облысы әкімінің Алғыс хаттарымен марапатталды.

- «Күй & джаз» жиынына келіп, ерекше рухани демалыс алып қайттым. Себебі, жұмыстың барысы мен өмірдің күйбең тіршілігінде осындай болмысы бөлек әлемнің барына көңіл аудармармай жатамыз. Бұл – қазақтың қос ішегі мен домбыраның үндесуі болды. Оркестр ұжымына шығармашылық табыс тілеймін,- деді қала тұрғыны Арайлым Төлегенова. Сонымен қатар, кеште «Күй & джаз» концертінің арнайы Астанадан келген қонағы, Талғат Баритұлының өнердегі, өмірдегі досы, сиқырлы таяқшаның падишасы, елімізге танымал, Қазақстан Республикасының еңбек сіңірген қайраткері, «Дарын» мемлекеттік жастар сыйлығының лауреаты, Қазақ Ұлттық өнер университетінің профессоры, дирижер Дәурен Ғлымов өнерін жиналған көрерменге паш етті. Музыкалық кешке 900-ге жуық тыңдарман жиналды. Концерттің соңында жергілікті композитор Серік Мұсәлімов, Дания Қабидолла, Серік Рысбек және Мадияр Бақтияровтың орындауындағы «Мой Казахстан» әнінің жаңа нұсқасының тұсауы кесілді.

Pavlodarnews.kz

Суретті түсірген – Есенжол Исабек.