Әрдайым оқырманмен бірге!

Павлодар облыстық «Saryarqa samaly» және «Звезда Прииртышья» газеттеріне жазылу науқаны жүруде. Осы орайда оқырманмен жүздесу үшін «Eртіс Mедиа» жауапкершілігі шектеулі серіктестігі
Республика күніне орай Аққулы және Тереңкөл аудандарында болып қайтты.

Аққулы ауданының орталығында Республика күніне орай мерекелік шаралар өтті. Патриоттық әндер орындалып, түрлі спорттық шаралар, көрмелер ұйымдастырылды. Аудан әкімі Абзал Балғабаев елді мекен тұрғындарын Респуб-лика күнімен құттықтап, еңбек азаматтарына «Аудан алдындағы сіңірген еңбегі үшін» төсбелгісін және «Даңқ аллеясының» сертификаттарын табыстады.

- Сіздерді Республикамыздың әр азаматы үшін айтулы мереке – Республика күнімен құттықтаймын! Біз араға 13 жыл салып осы мерекені қайта атап өтудеміз. Бұл күн - ата-бабамыз аңсаған арманның жүзеге асқан, елімізге еркіндік сыйлаған Ұлы күн. Осындай маңызы бар тарихи думанда еліміздің туы асқақтап, келешегі өркендей берсін, - деді А.Балғабаев. Аудандық ішкі саясат бөлімі басшысының міндетін атқарушы Гүлден Қасымова өтіп жатқан шараның барысы жайында баяндап берді.

- Аудандық бөлімдердің демеу-шілігімен ыстық тамақ, бауырсақ таратылуда. Аудандық білім беру бөлімінің ұйымдастыруымен бала-ларға арналған «Балалар әлемі» атты алаңы өткізілуде. Сондай-ақ, «Ертіс Медиа» күні өткізілуде. 2023 жылға жазылған тұрғындар арасында аудан кәсіпкерлерінің қолдауымен тігілген сыйлықтар ойнатылады, - деді Г.Қасымова. Республика күніне орай өткен мерекелік шарамен қатар облыстық «Saryarqa samaly» және «Звезда Прииртышья» газеттеріне 2023 жылға жазылу науқаны өткізіліп, аталған басылымдарға жазылған оқырмандар үшін арнайы ұтыс ойыны жарияланып, бағалы сыйлықтар ойнатылды. Сыйлыққа Аққулы аудандық ауыл шаруашылығы, орталық кітапханалар жүйесі, мәдениет бөлімінің қызметкерлері мен кәсіпкерлерінің демеушілігімен газеттерге жазылған тұрғындар арасында ауылшаруашылық өнім-дері: шөп, картоп, қой, 30 қазан күні Естай атындағы мәдениет сарайында өтетін «МузАрт» тобының ән кешіне 2 билет, тұрмыстық заттар және ақшалай сертификаттар ойнатылды. Жеңімпаздарға сыйлықтар сол жерде үлестірілді. Газеттің тұрақты оқырманы, ұтыстардың біріне ие болған аудан тұрғыны Бағия Садықова ғаламтор желісі қанша дамыса да, газеттің мәртебесі ешқашан түспейді дейді.

- Біз бір ғасырға жуық тарихы бар «Saryarqa samaly» газетін отбасымызбен оқимыз. Әр нөмірін қалт жібермейміз. Басылымдағы әр айдарды әсіресе, «Шамшырақ», «Шипагер», «Талбесік» арнайы беттерін оқып тұрамыз. «Айналайын» қосымшасына балаларым өлеңдерін, әңгімелерін жиі жолдап отырады. Гаджеттердің дамып, ғаламтордың өрлеген кезеңі болса да, ақпарат саласында газеттің алар орны ерекше. Мүмкін ғаламтордағы ақпаратты өшіре аламыз, ал газеттегі жазба – қашап жазылған мыңжылдық тарихы бар жазудай. Ең маңыздысы, ақпараттың дұрыстығы мен сауаттылығына жауап беретін журналистердің адал еңбегі. Газет оқып, өзектілігін сақтап қалсақ, гаджетке байланған, ғаламторға тәуелді адам болудан сақтанамыз, - дейді Б.Садықова. Аудандық кітапханалар жүйесінің басшысы Дарико Табулова кітапханашы ретінде газеттерде балаларға арналған танымды айдарлардың жиі шығып тұруына назар аудару керектігін айтты.

- Қай тілде болсын, әр газетте балаларға арналған шығармашылық айдарлар жиі шығып тұруы керек. Себебі, балалар жан-жақтылықты қалайды және жан-жағындағы дүниелерді қызығып зерттей бастайды. Балалар тек кітаппен ғана емес, газетпен де дос болуы қажет. Ең бастысы балаларды шығармашылыққа тарту керек. Мәселен, біздің аудандық кітапханалар жүйесінде әр апта сайын балаларға арналған түрлі шаралар ұйымдастырылады, - дейді Дарико Абаққызы. Сондай-ақ, ұлттық мереке қарсаңында Малыбай ауылында жастар арасында көкпардан жарыс өтті. Жарысқа жалпы 5 команда қатысып, өзара бақ сынасты. Нәтижесінде Екібастұз қаласының Ақкөл командасы топ жарып, 1-орынды иеленді. 2-орынға Мерғалым ауылының командасы лайық деп табылса, 3-орынды Шарбақты ауылының командасы еншіледі. Тереңкөл ауданында да шара осы мазмұнда өтті. Аудан әкімі Азамат Маңғұтов тілек тілеп, аудан тұрғындарын Республика күнімен құттықтады.

- Сіздерді еліміздің ұлттық мерекесі – Республика күнімен шын жүректен құттықтаймын! Республика күні – еліміздің игілігі, баға жетпес құндылық. Сол себепті бұл күннің мән-маңызын жас ұрпаққа көбірек дәріптеп, ұлттық рухты асқақтататын, айбынымызды асыратын іс-шаралар ұйымдастырып, жоғары деңгейде атап өтуіміз шарт, - деді А.Маңғұтов. Қос газеттің редакторлары газетке жазылуды ұйымдастырған білім, кітапхана саласының қызметкерлеріне сертификаттар ұсынды. Облыстық «Saryarqa samaly» газетінің бас редакторы Нұрбол Жайықбаев өз сөзінде Тереңкөл ауданының тарихы тереңде екенін, оны ұлықтауда газеттің рөлі маңызды екенін атап өтті. «Арғы тарихты айтпағанда, бұл өңір - Ұлы Отан соғысы жылдарында өшпес ерлік көрсеткен Кеңес Одағының батырлары Құдайберген Сұрағанов, Алексей Елгин, Иван Кривенко сынды батырлар туған жер. Бертінгі Тәуелсіздік алған уақытта осы ауданның тарихын зерттеп, үлкен кітап жазған қаламгер Көкіш Әміржанов ағамыздың да еңбегі еселі. Оларды ұмытпау жолында жас ұрпаққа газет жаздырып оқыту аса қажет. Барлығыңызға тек бақ-береке тілеймін», - деді Нұрбол Қанатбекұлы. Салтанатты шара барысында «Звезда Прииртышья» газетінің бас редакторы Владимир Долгушев те сөз сөйлеп, оқырмандарға 2023 жылға газетке жазылған жағдайда 100 мың теңге ұтып алу мүмкіндігі берілетін ұтыс ойыны жарияланғанын хабарлады. Шара барысында қазақ тілін үйретуші маман Шолпан Кинжикованың арнайы киіз үйі қызмет көрсетті. Онда тіл үйренушілер ұлттық тағам – бауырсақты пісіру жолымен танысып, ыстық дәмнен барлығы ауыз тиді. Жалпы алғанда, аудандардағы оқырмандармен кездесу мазмұнды өті. Ең бастысы, тұрғындарға газеттің сөзі жүз жылдық, әлеуметтік желілердің жалаң хабары бір күндік екені түсіндірілді.

Айдана БОРАНБАЕВА,

Аққулы, Тереңкөл аудандары.

Суреттерді түсірген –
Есенжол Исабек,
Константин Шелков.