Сарсаңға салған «Tik-Tok»

Әлеуметтік желілердің бірегейіне айналған «Тік-Ток» желісі «Youtube» «Facebook» желілерінен кейін шықса да, оларды басып озып, жалпақ
жұртқа бірден танылды. Әсіресе, екі жылдық карантиндік үзіліс кезінде адамдарға бос уақытын өткізуге себепкер болды.
Жалпы, «Tik-Toк» желісі 2016 жылы Қытай елінен бастау алғаны баршаңызға мәлім шығар. Желіде 15 секундтық видеолар түсіріп, оны достарымен бөлісіп, әсем әуендермен де әрлеуге болады. Өзіңіздің ой-қиялыңызға байланысты. Күнделікті қолданып жүрген «Instagram» және «Снапчатқа» ұқсас жақтары көп. Мысалы, мұнда да ұнаған видеоға лайк басып, пікір жазуға, бөлісуге, өзге қатысушыларға, ең қызықтысы, ұнаған видеоңызды өзіңіздің ұялы телефоныңызға сақтап алуыңызға болады.
Кейбір қолданушылар жай қызығушылық үшін пайдаланса, кейбірі басқа әлеуметтік желілердегідей бұл желіні де табыс көзіне айналдырған. Желінің пайдасы жетерлік. Алайда пайдасынан қарағанда зияны көбірек. Белгілі психологтардың пікіріне жүгінсек, бұл желі балалар мен жасөспірімдердің психологиясына кері әсерін тигізеді екен. Мысалы, балалардың бір видеодағы қимылды қайталай алмай ашуға берілетіні оның психикасына үлкен әсер етеді. Жастар миллиондаған қаралым, лүпіл, пікір жинау үшін түрлі қимылдар жасап, небір әрекеттерге барып жатады. Тағы бір айта кетерлігі, жастар арасында көре алмаушылық, қызғаныш сезімдері пайда болады. Мұның барлығы балалар мен жастардың психологиясының бұзылуына ықпал етеді. Тіпті, оның салдары адам өліміне де әкеліп, қазаға ұшырап жатқандар да аз емес. Жуырда Ақтау қаласында үш бозбала «Тік-Токқа» видео түсіремін деп, оның біреуі теңізге батып кеткен. 12 сағаттық іздеу жұмыстарынан кейін жасөспірімнің денесі алты метр тереңдіктен табылған. Тағы бір мысал, Шымкент қаласындағы бойжеткен қыз видео түсіремін деп 27 мың вольттық теміржол өткеліндегі қорғаныс торына мініп алып, өзін видеоға түсіре бастаған. Түсемін деп жерге секіргенде шашы электр сымына тиіп кетіп, қыздың киімі лезде жана бастаған. Жедел жәрдем келгенше қыздың 91% денесін күйік шалған. Айтар мысалдар жетерлік. Бұл - солардың біреуі ғана. Қазіргі уақытта тек жастар ғана емес, ересек адамдар да жасөспірімдерден қалыспайды. Бұл келешек жастарға қандай тәрбие?
Бұл ретте жастардың пікірін білу мақсатында жоғары оқу орнының студентінің ойын білдік.
- «Тік-Ток» желісі - қарқынды дамып келе жатқан әлеуметтік желілердің бірі. Онда қызықты видеолар түсіре аласың. Мәселен, ән айтып, би билеп, түрлі қимылдарды қайталап, челлендж де түсіруге болады. Бұл қазіргі жастарға өте қызықты. Бір видео түсіріп, көптеген қаралым жинап, әлем бойынша танымал болып кетуің де мүмкін. Теріс жақтары да жоқ демеймін, бар, әрине. Онда кіріп қалсаң, шыға алмайсың. Көп уақытыңды алады. Бірақ өзіме уақыт бойынша шектеу қойдым, - дейді өңірлік студент Айзада Құрмаш.

Түйін:

Еңбектеген баладан еңкейген шалға дейін назарын
аударған Тік-Токтың қолданушылары күн сайын артуда. Әлеуметтік желінің жақсы жақтары баршылық, алайда көп жағдайда балалар мен жасөспірімдердің психикасына теріс ықпал етуде. Сол себептен қазірден бастап баланың не көріп, не жасап жүргенінен әр ата-ана хабардар болып, бейқам болмауы қажет. Балаларға, әсіресе өтпелі кезеңде жүрген жасөспірімдердің тәрбиесіне жіті көңіл бөліну керек. Ал көптің көзайымына айналған бұл желінің біршама уақыт өткеннен соң өз дәурені аяқталар. Қазір бұл желіде түрлі видео түсіріп жүрген балаларыңызды өздеріңіз қолға алмасаңыздар болмас. Ал құрметті ата-ана, дәл қазір сіздің балаңыз не істеп, не көріп жүр?

Айдана БОРАНБАЕВА.

Количество показов: 452

Возврат к списку