Сайлау-2022: Дауыс берушілердің тілегі қандай?

ҚР Президенттігінен үміткер 6 кандидат өңірлерді аралап, әр түрлі әлеуметтік топ өкілдерімен кездесуді жалғастыруда. Үгіт-насихат шаралары барысында әр кандидаттың сайлауалды бағдарламасы таныстырылып, дауыс берушілердің талап-тілектері де ескеріліп жатыр. Осы орайда үміткерлердің соңғы бірнеше күн дересінде атқарған жұмыстарына аз-кем шолу жасаған едік.

Екібастұзға келді

Өткен аптада біздің облысқа «Ауыл» халықтық-демократиялық патриоттық партиясынан ұсынылған кандидат Жигули Дайрабаев келіп, жұртшылықпен жүздесті. Алдымен кандидат Екібастұз қалалық ақсақалдар кеңесімен кездесті. Олармен шахмат ойнай отырып, әңгімелесіп, біршама мәселені талқылады. Ақсақалдар кандидатқа зейнетақы активтерін басқаруды қалай жоспарлайтыны жайында сұрақ қойды. Содан соң Екібастұз қаласының базарында болып, жергілікті азық-түлік нарығындағы жағдаймен танысты. Кандидат сатушылармен, сатып алушылармен, өнім жеткізушілермен кездесті. Олардың ел өміріне қатысты пікірлерін тыңдады. Бұл ретте сатып алушылар тарапынан бағаға қатысты көптеген сұрақ болды. Әсіресе, бағаның тұрақсыздығы, оның үнемі көтерілетіні, тауардың қымбаттығына мән берілді. Сатушылар кейбір отандық тауар өндірушілердің өнімдерді жүйелі түрде жеткізбейтініне, сондықтан импорттық дайын өнімдерді сатылымға қоюға тура келетініне қатысты шағым болды. Сонымен қатар, Жигули Дайрабаев Алматы қаласының іргесіндегі Нұра ауылының сайлаушыларымен кездесті. Бұл елді мекен Алматы қаласынан 42 шақырым жерде орналасқан. Кандидат ауылдың тұрмыс-тіршілігімен танысып, ауылға дейінгі жол сапасын көзімен көріп, өз бағдарламасын таныстырды.

Басты шарт - келісім

Президенттікке кандидат Қасым-Жомарт Тоқаевты қолдау жөніндегі республикалық қоғамдық штабының мүшелері Жамбыл облысына барып, зиялы қауыммен, этномәдени бірлестіктердің өкілдерімен, педагогтармен, студенттермен және көпбалалы аналармен бірқатар кездесу өткізді. Мәселен, этномәдени бірлес-тіктердің өкілдерімен болған кездесуде республикалық қоғамдық штабтың басшысы Ерлан Қошанов бүгінде кез келген қоғамды дамы-тудың басты шарты келісім екенін атап өтті. Жоғары оқу орындарының оқытушы-профессорлық құрамымен, студенттер қауымымен кездесу барысында кандидаттың сайлауалды бағдарламасының білім және ғылым саласындағы басымдықтары талқыланды. Ал ардагерлермен және зиялы қауым өкілдерімен кездесуде бағдар-ламадағы мәдениет пен өнерді қолдау шараларына баса назар аударды. Сондай-ақ, сайлау науқаны басталғалы Генералдар кеңесі үгіт-насихат науқанына белсенді қатысып, жұртшылықпен, ардагерлердің отбасыларымен кездесіп, Халықтық коалиция ұсынған кандидаттың сайлауалды бағдар-ламасының басымдықтарын талқылап жатыр. «Генералдар кеңесі» РҚБ мүшесі, генерал-майор Дәулет Салханов дауыс беру күні Қазақстанның әрбір азаматы өзінің азаматтық ұстанымын тек сөз жүзінде ғана емес, нақты іспен танытқаны маңызды екенін атап өтті.

Білім экономикасы дамыса...

Президенттікке кандидат Салтанат Тұрсынбекова Алматы қаласында тұтынушылардың құқықтарын қорғау мәселелері бойынша азаматтармен, зияткерлік меншікті қорғау тақырыбын қозғап, қалалық құқық қорғаушылармен және қоғамдық пікір көшбасшы-ларымен, Қазақ ұлттық қыздар педагогикалық университетінің студенттерімен, сондай-ақ «Родник» дағдарыс орталығының басшысымен түрлі кездесулер өткізді.

- Әлемдегі жағдай өзгеруде. Қоғамның өркендеуінің ең үлкен құндылығын қазір табиғи ресурстар, мұнай мен газ кен орындары жасамайды. Ең көп нәтижені білім экономикасы береді: жаңа технологиялар, ноу-хау, зияткерлік меншік және тағы басқалары, - деп атап өтті құқық қорғаушы Алматыда өткен жиын барысында. Ол көп жағдайда фотографтар, музыканттар, режиссерлер елімізде зияткерлік меншікті қорғау мәселесі үнемі екінші орында тұрғанына шағымданатынын атап өтті.

- Қазақстанда контент үшін ақша төлеу ұят деп есептеледі. Құқық қорғау үшін сотқа жүгіну мәдениеті жоқ. Мәселен, микро-толқынды пеш ұрлағаны үшін адам түрмеге түссе, өнер туындысын ұрлағаны үшін жазадан құтыла алады. Сондықтан бір нәрсені ұрлау – ұят, ал ақыл-ой еңбегінің өнімін сұрамай-ақ тартып алу қалыпты жағдай болып кеткен, - деп қосты ол. Сонымен қатар, Салтанат Тұрсынбекова Алматыда Желтоқсан оқиғасы құрбандарын еске алып, «Тәуелсіздік таңы» монументіне гүл шоқтарын қойды.

Халықаралық ұйым қолдауы

Дүниежүзілік кәсіподақтар Федерациясы (WFTU) Қазақстан Республикасының Президент сайлауына «Аманат» Қазақстан кәсіподақтар ынтымақтастығы» бірлестігінен кандидаттың ұсынылуын қолдады. Аталмыш ұйым үміткер ретінде Мейрам Қажыкеннің кандидатурасын ұсынған болатын. Федерация қарапайым жұмысшылардың мүдделерін білдіретін саяси емес ұйымның жоғары деңгейдегі күреске қатысуға ниет білдіргенін оң қабылдап, бұл туралы WFTU Facebook әлеуметтік желісіндегі парақшасында хабарлады. Ал Мейрам Қажыкен бұл уақытта Өскемен қаласындағы бірқатар нысанға барып, еңбек ұжымдарымен кездесті. Кандидат «Өскемен ГЭС АЭС» ЖШС ұжымымен кездесіп, сайлауалды бағдарламасын таныстырып, қызмет-керлерінің сұрақтарына жауап берді. Сондай-ақ, Шығыс Қазақстан ауруханасы диагностикалық орталығының қызметкерлерімен, «Каравай», «Восток молоко» кәсіпорын-дарының ұжымымен жүздесті. Бұған дейін ҚР Президенттігіне кандидат Мейрам Қажыкен үгіт-насихат науқаны аясында Семей медициналық университетінде, «Семей Инжиниринг» зауытында да болған еді.

Жастарды не алаңдатады?

ҚР Президенттігіне үміткер Қарақат Әбденнің ел өңірлеріндегі үгіт-насихат жұмыстары жалғасуда. Жезқазған қаласына ат басын бұрған үміткер жергілікті сайлау-шылармен, жастар қауымымен кездесті. Жиын барысында жастарды толғандырып жүрген сұрақтар талқыланды. Олардың қатарында орта техникалық және жоғары білім, жатақхана мәселелері бар.

- Ертеңгі үмітіміз, болашағымыз – жастар. Олардың жағдайын қамтамасыз ету - біздің негізгі міндетіміз. Жастарға бүгін көрсетілген көмек — бұл біздің ертеңгі күнімізге тікелей инвес-тиция. Жастармен кездесу барысында көптеген өзекті мәселелер көтерілді. Жастардың қоғамдық мәселелерге белсене араласып жүргені қуантады. Олар түрлі өзекті сауалдарды жолдап, ерекше идеяларымен бөлісуде, - деді Қарақат Әбден. Бұдан бөлек, жас ұрпақтың бойында ұлттық намыс пен патриоттық сезімді қалыптастыру, қыздардың үйлесімді тәрбиесіне көңіл бөлу жөнінде сөз қозғалды. Сондай-ақ, Қарақат Әбденнің сайлауалды штабы ТМД-ның байқаушылар миссиясы штабының басшысы Евгений Козяк пен осы ұйымның мүшесі Алла Харченкомен кездесті. Кездесу барысында үміткер үгіт-насихат науқанының барысы мен сайлауалды штабтарының жұмысы туралы әңгімелеп, сайлауалды бағдарламасының негізгі тұстарына тоқталды.

Марафон өтті

Жалпыұлттық социал-демократиялық партиясы атынан үміткер Нұрлан Әуесбаевты қолдау мақса-тында Алматы қаласында «Салауатты өмір салтын ұстану және табиғатты сақтау үшін!» акциясы ұйымдастырылды. ЖСДП мүшелері табиғат аясында жаттығу жасап, «Медеу» мұз айдыны алдындағы 842 сатыдан тұратын «Денсаулық баспалдағымен» бөгетке көтерілді. Акцияға партия мүшелері, ЖСДП жастар қанатының белсенділері мен қала тұрғындары қатысты. Сондай-ақ, марафон барысында партияның кандидаттың сайлауалды бағдарламасының негізгі бағыттары баяндалды. Қазақстандықтардың өмір сүру сапасының стандарттары азаматтардың денсаулығының кепілі екеніне назар аударылды. Ал Астанада тығыз орналасқан құрылысқа қарсы шара өтті. Оған қатысқан Нұрлан Әуесбаев құрылыс нысандарын бір-біріне тым жақын және тығыз салынуы тек елорда және Алматы қаласымен шектелмейтінін атап өтті.

- Бұл – Қазақстанның барлық дерлік қалаларына таныс жағдай. Тығыз орналасқан құрылыс нысандары қалада қолайсыз ортаны қалыптастырады, - деді Нұрлан Әуесбаев.

Шолуды жасаған – Құндыз ҚАБЫЛДЕНОВА.