Штабтарда жұмыс қызған шақ

ҚР Президенттігіне кандидат ретінде ұсынылған 6 үміткердің әр өңірде сайлауалды қоғамдық штабтары құрылды. Бүгінде аталмыш штаб өкілдері аудан-қалаларды аралап, еңбек ұжымдарымен, әр түрлі әлеуметтік топ өкілдерімен кездесіп, кандидаттардың бағдарламаларын кеңінен таныстыруда. Бұл ретте біздің өңірдегі өкілдіктердің жұмыс барысын біліп қайттық.

Ауылдарды аралауда

Халықтық коалиция атынан ұсынылған Қасым-Жомарт Тоқаевтың сайлауалды штабы аймақ тұрғындарының 60 пайызын үгіт-насихат шараларымен қамтуды жоспарлап отыр. Атап айтқанда, 472 мыңнан астам адамның арасында үміткердің сайлауалды бағдарламасын таныстырмақ ниетте. Соңғы үш аптаның өзінде бұл бағытта ауқымды жұмыс атқарылды.

Қасым-Жомарт Тоқаевтың біздің облыстағы сайлауалды штабы құрамында белгілі ардагерлер, кәсіпкерлер, өндіріс саласының қызметкерлері, журналистер мен еріктілер бар.

- Өңірде бір аймақтық, үш қалалық және 10 аудандық штаб іске кірісті. Олардың құрамында барлығы 346 адам жұмыс істейді. Сонымен қатар, кандидаттың 528 өкілі үгіт-насихат және түсіндіру шараларына белсенді қатысуда. Олар шалғай жатқан ауылдарға, тіпті 200 адамнан аз тұрғыны бар елді мекендерге барып, кандидаттың бастамаларын егжей-тегжейлі таныстырып келеді, - дейді облыстық штаб жетекшісі Илья Теренченко.

Сонымен қатар, өңірде бақылаушылар мен мобильді капитандар тобы жасақталды. Бақылау-шылар сайлау күні учаскелерде ережелердің сақталуын қадағаласа, капитандар мобильді мониторинг жүргізеді.

Біздің облыстан бастады

Облыста «Атамекен» Қазақстан кәсіподақтар достастығы» респуб-ликалық бірлестігі атынан сайлауға түсетін Мейрам Қажыкеннің де штабы құрылды. Осы уақытқа дейін штаб өкілдері аудан-қалаларда билбордтар орнатты. Ал еріктілер үгіт-насихат материалдарын таратумен айналысуда. Бұл бағыттағы жұмыстың барлығы кезең-кезеңімен іске асып жатыр.

- Кандидат Мейрам Қажыкен сайлауалды үгіт-насихат кампаниясын өзі туып-өскен, еңбек еткен Павлодар облысынан бастады. Өңірдегі жастармен, «Қазақстан алюминийі», «Ақсу ферроқорытпа зауыты» кәсіпорындарының еңбек ұжымдарымен жүздесіп, олардың өтініш-тілектеріне құлақ түрді. Сондай-ақ, кездесуге қатысушылар алдында әлеуметтік теңдік, әріптестік, барлығына қолжетімді орта қалыптастыру, мәдени құндылықтарды дамытуға бағытталған сайлауалды бағдарламасын таныстырды, - дейді облыстық сайлауалды штаб жетекшісі Нұржан Сейтен.

Осы уақытқа дейін штаб өкілдері Екібастұз, Ақсу қалалары мен Аққулы, Тереңкөл, Май аудандарында болып, тұрғындармен кездесулер ұйымдастырды. Соның барысында жұртшылық жалақыны көтеру, азық-түлік бағасын реттеу сынды мәселелерді көтерді. Айта кетейік, кандидаттың біздің облыста 10 сенімді өкілі бар. Сондай-ақ, оларға 7 ерікті көмек көрсетеді.

Көпшілікті қамтуды көздейді

Жалпыұлттық социал-демократиялық партия ұсынған кандидат – Нұрлан Әуесбаевтың Павлодар облысындағы сайлауалды штабы үгіт-насихат жұмыстарының бірінші толқынын аяқтады. Бұл уақытта елді мекендерде кандидаттың ұран сөзі жазылған билбордтар орнатылды.

- Сонымен қатар, штаб өкілдері мен еріктілер «Есіктен-есікке» қағидасы бойынша белсенді жұмыс атқаруда. Бұл бағыттағы жұмыс кезең-кезеңімен іске асады. Соның нәтижесінде облыстың аудандары мен қалаларындағы неғұрлым көп сайлаушыларды қамту ойымызда бар, - дейді облыстық сайлауалды штаб жетекшісі Ажар Сағандықова.

Одан бөлек, түрлі мекеме қызметкерлерімен, еңбек ұжым-дарымен кездесулер жалғасуда. Айталық, таяуда сайлаулды штаб өкілдері С.Торайғыров атындағы облыстық әмбебап кітапханада дауыс берушілермен кездесті. Қала тұрғындарына кандидаттың сайлауалды бағдарламасы таныстырылып, басым бағыттар белгіленді.

Ажар Сағандықованың айтуынша, бұл кездесу ұсыныстарға, өзекті мәселелерді талқылауға толы болды.

Бағдарлама талқыланды

ҚР Президенттігінен үміткер Салтанат Тұрсынбекованың облыстық сайлауалды штабы да белсенді түрде жұмыс істеуде. Штаб үйлестірушісі Медет Мұхтаров үміткердің сенімді өкілдері мен еріктілер үгіт-насихат шараларын ұйымдастырып, еңбек ұжымдарымен кездескенін атап өтті. Сонымен қатар, плакаттарды орналастыру бойынша мобильді топтар жұмыс істейді.

- Штаб өкілдері аудан-қалаларға барып, тұрғындармен кездесуге ден қояды. Мәселен, бұған дейін Шарбақты ауданындағы тарихи-өлкетану музей қызметкерлерімен жүздесіп, аудандағы көпшілік жиналатын, рұқсат етілген орындарға плакаттар қойдық. Сондай-ақ, Успен ауданында мектеп, сауда орны ұжымымен бірге сайлауалды бағдарламаны талқылап, сапаржайдағы қызметкерлер, жолаушылар арасында түсіндіру жұмыстарын жүргіздік. Осындай шара Ақсу қаласының әкімдігінде де өтті, - деді М.Мұхтаров.

Айта кетейік, кандидаттың біздің облыста бір штабы және 5 сенімді өкілі бар.

Мобильді топтар белсенді

Мемлекет басшысы атанудан үміткер Қарақат Әбден де біздің өңірге келіп, бірқатар нысанды аралап, еңбек ұжымдарымен жүздесті. Екібастұз қаласындағы перзентханада, музыкалық колледжде өткен кездесулер барысында өзінің сайлауалды бағдарламасының негізгі бағыттарын атап өтіп, дауыс берушілердің сұрақтарына жауап берді.

Кандидаттың облыстық сайлауалды штабы да жүздесулерді жалғастыруда. Штаб жетекшісі Гаухар Омарованың сөзінше, үгіт-насихат кезеңінде біздің өңірде 295 шара ұйымдастыру жоспарланған. Бүгінде оның 115-і өткізілді.

- Біз үміткердің сенімді өкілдері ретінде психикалық денсау-лықтың республикалық ғылыми-тәжірибелік орталығында, Екібастұз қаласындағы бірнеше балабақша болып, қызметкерлерге сайлауалды бағдарламаның тетіктерін түсіндірдік. Оған қоса, мобильді топтар ауылдарды аралап, дауыс берушілердің қатысуымен үгіт-насихат жұмыстарын жүргізіп жатыр, - дейді штаб жетекшісі.

Қарақат Әбденді қолдау бойынша құрылған штабта 16 сенімді өкіл еңбек етеді. Біздің облыста кандидаттың барлығы 13 штабы жұмыс істейді.

Алғашқы толқын аяқталды

«Ауыл» халықтық-демократиялық патриоттық партиясынан ұсынылған Жигули Дайрабаев та Павлодар облысында болып, дауыс берушілермен кездесіп үлгерді. Екібастұз қаласында ақсақалдар кеңесімен жүздесіп, кейін орталық базарға келушілермен тілдесті.

Біздің өңірде кандидаттың сайлауалды штабы үгіт-насихат жұмыстарымен айналысады. Бұл бағытта 100-ден астам шара өткізу жоспарда бар. Облыстық штабта 5 адам, аудандарда 10 адам және 58 ерікті жұмыс істейді.

- Еріктілер, партия белсенділері, қалалық және аудандық филиалдардың төрағалары үгіт материалдарын жапсырудың алғашқы толқынын аяқтады, - дейді штаб жетекшісі Николай Арсютин.

Осы уақытқа дейін сайлауалды штабының мобильді үгіт топтары облыстың бірқатар ауылдық округіне барып, үміткердің сайлауалды бағдарламасының негізгі бағыттарын түсіндіріп, дауыс берушілердің сұрақтарына жауап берді.

Еске сала кетейік, кандидаттардың сайлауалды үгіт-насихат шаралары 19 қараша күні сағат 00:00-ге дейін жалғасады. Ал 19 қараша - тыныштық күні. Бұл күні қандай да бір үгіт жұмыстарымен айналысуға болмайды.

Құндыз ҚАБЫЛДЕНОВА.