Жол сапасы жақсарды

Биыл облыста автомобиль жолын салу мен жөндеу бағытында ілкімді істер атқарылды. Соның нәтижесінде жақсы жағдайдағы жолдардың үлесі 90 пайызға жетті. Бұл - елдегі үздік көрсеткіш.

Павлодар облыстық мәслихатының кезектен тыс XVII сессиясында өңірдің әлеуметтік-экономикалық дамуына қатысты осы және өзге де өзекті мәселелер қаралды. Облыстық экономика және бюджеттік жоспарлау басқармасының басшысы Ирина Назарчук 2022-2024 жылдарға арналған облыстық бюджет шешіміне өзгерістер енгізуді ұсынды. Басқарма басшысының айтуынша, облыстық бюджеттің меншік кірістері негізінен қалаларда құрамның өсуіне байланысты корпоративтік табыс салығы, Павлодар қаласында жеке табыс салығы және әлеуметтік салық, жыл соңына дейін күтілетін түсімдерге сәйкес әкімшілік айыппұлдарды ұлғайту есебінен 1,7 млрд теңгеге өскен. Ал IV санат төлеушілерінің салық төлеуден босатылуына байланысты экологиялық төлемдер бойынша түсімдер көлемі 697 млн теңгеге азайды. Қазынаға түскен қосымша қаражат бірқатар мәселені шешуге жұмсалмақ. Мәселен, Беловка–Қалқаман, Галкин– Жаңаауыл–Алексеевка және Қызыл Октябрь–Жаңа Ақшиман жолдарын жөндеуге 795,5 млн теңге қаржы бөлу жоспарланып отыр.

- Ветеринария және ауыл шаруашылығы саласында жануарларда қауіпті инфекциялық аурулардың өсуінің алдын алуға 694,2 млн теңге, полиция қызметкерлеріне тұрғын үй төлемдерін бөлуге 135 млн теңге сомасында көзделген, – деді Ирина Назарчук. Жалпы, енгізілген өзгерістерді ескере отырып, облыстық бюджеттің нақтыланған көлемі 443,2 млрд теңгені құрады. Сонымен қатар, Ирина Назарчук мемлекеттік-жекеменшік әріптестік бойынша жоспарланған істерді атап өтті. Павлодар мен Ақсу қалаларындағы қарттар және мүгедектерге арнайы әлеуметтік қызметтер көрсету орталығының бірнеше қызметі жеке кәсіпкерге беріліп, Екібастұз қаласында осындай екі орталық ұйымдастырылмақ. Сол сияқты Павлодар қаласының №4 емханасы мен Кенжекөл ауылдық дәрігерлік амбулаториясы сатып алу құқығынсыз сенімді басқаруға беріледі. Мәселен, Кенжекөлдегі дәрігерлік амбулаторияны жаңғырту жобасының құны 23 млн теңге болса, Ақсу қаласының Ақсу шағын ауданында жылумен жабдықтау желісін салу жобасының құны – 3 млрд 300 млн теңге. Павлодар қаласының «Достық» шағын ауданындағы 2000 орынға арналған мектепті салу жобасын мемлекеттік-жекеменшік әріптестіктен алып тастау ұсынылды. Себебі жаңа мектеп құрылысын бюджеттік инвестициялық жобалар шеңберінде «Жайлы мектеп» жобасы аясында жүзеге асыру туралы шешім қабылданған. Облыстың жұмыспен қамтуды үйлестіру және әлеуметтік бағдарламалар басқармасының басшысы Альмира Дисюпова жеке инвестицияларды тарту есебінен арнаулы әлеуметтік қызметтерге мұқтаж адамдарды қамтуды ұлғайту мақсатында Екібастұз қаласындағы мекеменің жұмысына жеке кәсіпкер тарту жоспарланып отырғанын айтты. Бұл ретте мемлекеттік міндет көлемі 252 млн теңге көлемінде сақталады. Сонымен қатар жеке әріптес мүлкінің құны 47 576 500 теңге болатын «Өмір» оңалту-шығармашылық орталығы мемлекеттік-жекеменшік әріптестікке өтеді. Инвестор 2023-2027 жылдар аралығында жыл сайын 600 мың теңге қаржы құяды. Мәслихат сессиясының отырысы барысында тұрақты комиссиялар жұмысының қорытын-дысы талқыланды. Облыстық мәслихаттың құрылыс және тұрғын үй-коммуналдық шаруашылығы жөніндегі тұрақты комиссиясы 4 отырыс өткізген. Онда облыстың (республикалық, облыстық, аудандық) автомобиль жолдарында жүргізілетін құрылыс және жөндеу жұмыстарының сапасы, Павлодар, Екібастұз және Ақсу қалаларын абаттандыру, көгалдандыру және санитарлық жай-күйін жақсарту шаралары, жылумен жабдықтаушы ұйымдарды даярлау барысы, тағы басқа мәселелер талқыланды. Мәселен, ағымдағы жылы облыстың жолдарында жүргізілетін құрылыс және жөндеу жұмыстарының сапасы мен тиімділігі мәселесі қаралды. Жыл басынан бері 9 млрд. теңгеден астам қаржыға облыстық және аудандық маңызы бар автомобиль жолдарын күрделі және орташа жөндеу бойынша 40 жоба іске асырылды. Жақсы жағдайдағы жергілікті маңызы бар автомобиль жолдарының үлесі 90 пайыз немесе 3 457,7 шақырымды құрады. Биыл жалпы ұзындығы 190 шақырым болатын облыстық және аудандық маңызы бар автомобиль жолдарын орташа жөндеу бойынша 5 млрд теңгеден астам қаражатқа 17 жобаны іске асыру көзделген. «Қазавтожол» АҚ облыстық филиалының желісі бойынша биыл 8 млрд теңгеден астам қаражат бөлу жоспарланған. Өткен жылдың жол жөндеу жұмыстарының қорытындысы бойынша жақсы жағдайдағы жергілікті маңызы бар автомобиль жолдарының үлесі 90 пайызды құрағанын және бұл республика бойынша үздік көрсеткіштердің бірі екенін атап өткен жөн. Аталмыш комиссия мүшелері сайлаушылар көтеретін мәселелерді шешу үшін 32 депутаттық сауал жолдап, сайлаушылармен 50-ге жуық кездесу өткізіп, 30-дан астам азаматты жеке мәселелері бойынша қабылдаған. Оған қоса комиссия мүшелері жылу беру маусымына дайындық барысын басты назарда ұстап, жылу-электр орталықтарына арнайы барды.

Торғын ОРАЗАЛЫ.